ပဲခူးတိုင်း၊ ဒိုက်ဦးမြို့နယ် ရန်ကုန်-မန္တလေး အမြန်လမ်းပိုင်းမှာ ဒီဇင်ဘာ ၂၄ ရက် နေ့လယ်ပိုင်းက ယာဉ်တိမ်းမှောက်မှုဖြစ်ပွားပြီး ရဟန်း ၂ ပါး၊ ကိုရင် ၃ ပါးနဲ့ လူ ၂ ဦး ထိခိုက်ဒဏ်ရာ ရရှိခဲ့တယ်လို့ အမြန်လမ်းမီးသတ်တပ်ဖွဲ့ဝင်တွေက ပြောပါတယ်။
ရန်ကုန်-မန္တလေး အမြန်လမ်း မိုင်တိုင်အမှတ် ၅၇/၀ ဖာလုံကြားမှာ သံဃာတော်တွေ တင်ဆောင်လာတဲ့ Toyota Hilux Surf အညိုရောင်ကားဟာ ဒီဇင်ဘာ ၂၄ ရက် နေ့လယ် ၁၂ နာရီ ၅၀ မိနစ်က ယာဉ်မောင်းအိပ်ငိုက်သွားတာကြောင့် တိမ်းမှောက်ခဲ့ပါတယ်။
ယာဉ်တိမ်းမှောက်မှုကြောင့် ကားပေါ်ပါလာတဲ့ ရဟန်း ၂ ပါး၊ ကိုရင် ၈ ပါး၊ ကျောင်းသား ၃ ဦးနဲ့ ယာဉ်မောင်း ၁ ဦး စုစုပေါင်း ၁၃ ဦးထဲက ရဟန်း ၂ ပါး၊ ကိုရင် ၃ ပါး၊ ယာဉ်မောင်းနဲ့ ကျောင်းသား ၁ ဦးတို့ ထိခိုက်ဒဏ်ရာ ရရှိခဲ့ပါတယ်။
အမြန်လမ်းမီးသတ်တပ်ဖွဲ့ဝင်တဦးက “ယာဉ်မောင်းအိပ်ငိုက်သွားတဲ့ကား မှောက်သွားတာပါ။ ရဟန်းတပါးက ခေါင်းကွဲသွားပြီး နောက်တပါးက ခေါင်းပွန်းပြီး တံတောင်စစ်မှာ ပဲ့သွားတယ်။ လူ ၂ ယောက်ထဲက ကလေးတယောက်က ပါးလေး နည်းနည်းရောင်တာပဲ။ နောက်တယောက်ကတော့ ဗိုက်နဲ့ခါးနဲ့ ထိသွားတာ ဟုတ်မယ် အောက်ပိုင်းလှုပ်မရဘူး။ ကိုရင် ၃ ပါးထဲက တပါးက လက်ဖျံအသားပဲ့သွားတယ်၊ တပါးက ပေါင်ပဲ့သွားပြီး တပါးကတော့ အထဲကနံတွေဘာတွေ အောင့်သွားတယ်။ အသက်အန္တရာယ် စိုးရိမ်ရတဲ့ အခြေအနေတော့ မရှိကြပါဘူး” လို့ ပြောပါတယ်။
ယာဉ်တိမ်းမှောက်တဲ့နေရာကို ဘောနီ အမြန်လမ်းမီးသတ်ဖွဲ့ဝင်တွေနဲ့အတူ ဘောနီ အမြန်လမ်းရဲစခန်းမှ စခန်းမှူးနဲ့ တပ်ဖွဲ့ဝင်တွေက သွားရောက်ကူညီခဲ့ပြီး ဒဏ်ရာရရှိသူတွေကို EMS 192 လူနာတင်ယာဉ်နဲ့ ပဲခူးပြည်သူ့ဆေးရုံကြီးကို ပို့ဆောင်ပေးခဲ့ပါတယ်။
ရန်ကုန်-မန္တလေး အမြန်လမ်းမကြီး မိုင်တိုင်အမှတ် ၃၂၄/၅ မှာ ဒီဇင်ဘာ ၂၁ ရက်ကလည်း ယာဉ်တိုက်မှုဖြစ်ပွားပြီး ၁၀ ယောက် ဒဏ်ရာရရှိခဲ့ပါတယ်။
