ထိုင်းနိုင်ငံ၊ ရနောင်းမြို့ကို တရားမဝင် ဝင်ရောက်လာတဲ့ မြန်မာနိုင်ငံသား ၁၃ ဦးကို ထိုင်းလုံခြုံရေးတပ်ဖွဲ့က ဒီဇင်ဘာ ၈ ရက် ညပိုင်းမှာ ဖမ်းဆီးရမိခဲ့တယ်လို့ ရနောင်းအခြေစိုက် အမှတ် ၂၅ ခြေမြန်တပ်ရင်းက ထုတ်ပြန်ပါတယ်။

ရနောင်းခရိုင် စုခ်စာမ်ရာမြို့ စစ်ဆေးရေးဂိတ်မှာ နယ်မြေလုံခြုံတပ်ဖွဲ့က ဒီဇင်ဘာ ၈ ရက် ညပိုင်းက မသင်္ကာဖွယ်ရာ ပစ်ကပ်ကား တစီး တွေ့ရှိလို့ သွားရောက်စစ်ဆေးခဲ့ရာ ယာဉ်မောင်းကို မတွေ့ရှိဘဲ တရားဝင်အထောက်အထားစာရွက်စာတမ်းမပါရှိတဲ့ မြန်မာနိုင်ငံသား ၆ ဦး ကို ဖမ်းဆီး ရမိခဲ့ပါတယ်။

နယ်မြေလုံခြုံရေးအဖွဲ့တွေ စစ်ဆေးချက်အရ မြန်မာနိုင်ငံသား ၆ ဦးကို တင်ဆောင်လာတဲ့ ထိုင်းနိုင်ငံသား ယာဉ်မောင်းဟာ စစ်ဆေးရေးအဖွဲ့တွေကို တွေ့ရှိတာနဲ့ ကားကို ထားပြီး ထွက်ပြေး သွားခဲ့ပါတယ်။

နခေါစီခရိုင် ဘန်င်ခန်မြို့မှာလည်း ဘန်ကောက်မြို့မှ ရနောင်းမြို့သို့ပြေးဆွဲလာတဲ့ ဘက်စ်ကား ပေါ်မှာ တရားမဝင် ဝင်ရောက်လာတဲ့ မြန်မာနိုင်ငံသား ၇ ဦးကို နယ်မြေလုံခြုံရေးအဖွဲ့တွေက ဒီဇင်ဘာ ၈ ရက် ညပိုင်းမှာ ထပ်မံဖမ်းဆီးရမိခဲ့ပါတယ်။

ဖမ်းဆီးရမိခဲ့တဲ့ မြန်မာနိုင်ငံသား ၁၃ ဦးလုံးကို ဥပဒေအရအရေးယူနိုင်ဖို့ သက်ဆိုင်ရာရဲစခန်းမှာ ပို့ဆောင်စစ်ဆေးနေတယ်လို့ ရနောင်းအခြေစိုက် အမှတ် ၂၅ ခြေမြန်တပ်ရင်းက ထုတ်ပြန် ပါတယ်။

ရနောင်းခရိုင် စုခ်စာမ်ရာမြို့မှာ နိုဝင်ဘာ ၂၉ ရက်ကလည်း တရားမဝင် ဝင်ရောက်လာတဲ့ ဝင်ရောက်လာတဲ့ မြန်မာနိုင်ငံသား ၇ ဦးကို နယ်မြေလုံခြုံရေးအဖွဲ့က ဖမ်း‌ဆီးရမိခဲ့ပါတယ်။

Photo. အမှတ် ၂၅ ခြေမြန်တပ်ရင်း(ရနောင်း)