မြန်မာ-ထိုင်းနယ်စပ်အနီးက စစ်ကောင်စီရဲ့ ရေတလျောက်တပ်စခန်းကို စက်တင်ဘာ ၁၄ ရက် မနက် ၈ နာရီလောက်မှာ KNLA ပူးပေါင်းတပ်ဖွဲ့တွေက တိုက်ခိုက်သိမ်းပိုက်ခဲ့ရာ စစ်သား ၉ ဦးသေဆုံးပြီး လက်နက်ခဲယမ်းမျိုးစုံ သိမ်းဆည်းရမိခဲ့တယ်လို့ KNU က ထုတ်ပြန်ပါတယ်။

ကရင်အမျိုးသားအစည်းအရုံး (KNU) တပ်မဟာ ၆ နယ်မြေ၊ ကော့ကရိတ်(ဒူးပလာယာ) ခရိုင် မြန်မာ-ထိုင်းနယ်စပ်အနီးက ရေတလျောက်စခန်းကို KNLA တပ်ရင်း ၁၈ နဲ့ PDF ပူးပေါင်းတပ်ဖွဲ့တွေက ဝင်ရောက်တိုက်ခိုက်ရာ နာရီဝက်နီးပါးအကြာမှာ တပ်စခန်းတခုလုံးကို သိမ်းပိုက်ရရှိခဲ့တာပါ။

အဲဒီတိုက်ပွဲအတွင်း စစ်ကောင်စီတပ်ဘက်က ၉ ဦးသေဆုံးကာ ကျန်တပ်သားတွေ ထွက်ပြေးလွတ်မြောက်သွားပြီး KNLA ပူးပေါင်းတပ်ဖွဲ့ဘက်က ရဲဘော် ၁ ဦး ကျဆုံးခဲ့ရသလို ၃ ဦး ဒဏ်ရာရရှိခဲ့ပါတယ်။

KNLA တပ်မှူးတဦးက "စစ်ကောင်စီတပ်တွေ ပိုပြီးလှုပ်ရှားလာတယ်။ တပ်စခန်းမကျရေး လူနဲ့ လက်နက်ခဲယမ်းတွေ ဖြည့်တင်းနေတယ်။ ဒါကြောင့် မြေပြင်တိုက်ပွဲတွေက နေ့တိုင်းနီးပါးရှိတယ်။ ဒါပေမဲ့ စစ်ကောင်စီတပ်တွေက စိတ်ဓာတ်ပိုင်းဆိုင်ရာမှာ မဖြစ်သာလို့ လုပ်နေရတဲ့ ပုံစံပဲရှိတော့တယ်။ ဒီနေ့ စခန်းသိမ်းတိုက်ပွဲက လက်တွေ့ပဲ" လို့ ပြောပါတယ်။

စခန်းသိမ်းတိုက်ပွဲအတွင်း လက်နက်မျိုးစုံ ၁၂ လက်၊ RPG-7 ကျည် ၇၀ လုံး၊ 81mm ကျည် ၄၀ လုံး၊ 60 mm ကျည် ၁၁၀ လုံး၊ M-79 ကျည် ၄၀ လုံး၊ 5.56 ကျည် ၂၈၀၀ တောင့်၊ 7.62 ကျည် ၈၀၀ တောင့်၊ တိုက်မိုင်း ၂၀ လုံး၊ နင်းမိုင်း ၂၃ လုံး၊ ရှေ့ထွက်မိုင်း ၃ လုံး၊ ဆက်သွယ်ရေးစက်ကြီး ၁ လုံး၊ မြေပုံ ၁ ရွက်၊ လက်ပစ်ဗုံး ၂၀ လုံးနဲ့ Compass ၂ လုံးတို့ကို သိမ်းဆည်းရမိခဲ့ပါတယ်။