နေပြည်တော်ကောင်စီနယ်မြေ လယ်ဝေမြို့မရဲစခန်း ဒီနေ့ညနေ ၅ နာရီက ပစ်ခတ်ခံရပြီး ရဲအုပ်အပါအဝင် ၃ ဦး ထိခိုက်ဒဏ်ရာရခဲ့တယ်လို့ မြို့ခံတွေက ပြောပါတယ်။
လယ်ဝေးမြို့နယ် အမှတ် ၄ ရပ်ကွက်ရှိ မြို့မရဲစခန်းကို ဒီနေ့ ညနေ ၅ နာရီက ဆိုင်ကယ်စီးလာသူ အမျိုးသား နှစ်ဦးက ဗုံးနဲ့ပစ်ခတ်ခဲ့ရာ ရဲ ၃ ဦး ထိခိုက်ဒဏ်ရာရခဲ့တယ်လို့ ရပ်ကွက်နေသူတဦးက ပြောပါတယ်။
"ဆိုင်ကယ်နဲ့ လာပစ်တာ၊ ရဲတွေလည်း အလစ်ခံလိုက်ရတယ်၊ ဗုံးနဲ့ပေါက်တာ အမှုစစ်နဲ့အဖွဲ့က ပြေးထွက်လာတဲ့အချိန် ထိတာ။"
ဗုံးပေါက်ကွဲမှုကြောင့် လယ်ဝေးမြို့မရဲစခန်းမှ ဒုရဲအုပ် ၁ ဦး၊ ရဲတပ်ကြပ်ကြီး ၁ ဦး၊ ရဲတပ်သား ၁ ဦး ထိခိုက်ဒဏ်ရာရခဲ့တယ်လို့ ရဲတပ်ဖွဲ့နဲ့နီးစပ်သူတဦးက အတည်ပြုပြောပါတယ်။
"ရဲအုပ်က စိုးရိမ်ရတယ်၊ ကျန်တဲ့နှစ်ယောက်က သိပ်မစိုးရိမ်ရဘူး၊ အခု ခုတင် ၁၀၀၀ ကို ပို့ထားတယ်။"
ပစ်ခတ်မှုဖြစ်ပြီးနောက် လယ်ဝေးမြို့နယ် လမ်းဆုံ၊ လမ်းခွတွေမှာ စစ်ကောင်စီတပ်၊ ရဲနဲ့ စရဖ အဖွဲ့တွေက စစ်ဆေးမှုတွေ ပြုလုပ်နေတယ်လို့ မြို့ခံတွေက ပြောပါတယ်။
ပြီးခဲ့တဲ့နှစ် ဒီဇင်ဘာ ၁ ရက်က နေပြည်တော်ကောင်စီနယ်မြေ လယ်ဝေးမြို့ ၅ ရပ်ကွက် ဗိုလ်ချုပ်ကြေးရုပ်အနီးရှိ ယာဥ်ထိန်းရဲကင်းမှာ ဗုံးပေါက်ပြီး တချို့ထိခိုက်ဒဏ်ရာရခဲ့ပါတယ်။
