စစ်ကိုင်းတိုင်း၊ ကလေးမြို့က စစ်ကောင်စီရဲ့ ဖမ်းဆီးခံထားရတဲ့ ကလေးပင်မသပိတ်အဖွဲ့ဝင် ၄ ဦးကို စစ်ကောင်စီက ရာဇသတ်ကြီးပုဒ်မ ၅၀၅(က) နဲ့ ထောင်ဒဏ် ၂ နှစ်စီ ချမှတ်လိုက်တယ်လို့ မိသားစုဝင်တွေက ဒီဗွီဘီကို ပြောပါတယ်။
အဆိုပါသပိတ်အဖွဲ့ဝင် ၄ ဦးကို မေ ၁၀ ရက် မနေ့က မြို့နယ်တရားရုံးမှာ အမိန့်ချခဲ့တာဖြစ်ပြီး ဆူပူဆန္ဒပြပွဲတွေမှာ ပါဝင်ခဲ့ကာ ပြည်သူတွေကို အကြမ်းဖက်လှုပ်ရှားမှုတွေမှာ ပါဝင်လာစေဖို့ လှုံ့ဆော်တာကြောင့် ၅၀၅(က) အရ ထောင်ဒဏ် ၂ နှစ် ချမှတ်ခဲ့တာလို့ စစ်ကောင်စီသတင်းတွေ အမြဲဖော်ပြနေတဲ့ တယ်လီဂရမ်ချန်နယ်တွေမှာ ရေးသားထားပါတယ်။
ဖမ်းဆီးခံခဲ့ရတဲ့ မိသားစုဝင်တဦးက “၄ ယောက်လုံးနဲ့ တွေ့ခွင့်ရခဲ့တယ်။ ၄ ယောက်လုံးကို အချုပ်ကနေ ထောင်ထဲပို့လိုက်ပြီ။ ကျန်တဲ့အမှုတွေနဲ့ တရားစွဲဆိုတာတော့ မရှိပါဘူး” လို့ ပြောပါတယ်။
ဧပြီ ၁၆ ရက် သင်္ကြန်အတက်နေ့က ကလေးပင်မသပိတ်အဖွဲ့ဝင် ကိုသန်းစိုးဦး၊ ကိုမျိုးကိုဝင်း၊ မနှင်းစံနဲ့ မကျင်ဒိတ်ကင်တို့ဟာ တော်လှန်သင်္ကြန်သပိတ် ပြုလုပ်စဉ် စစ်ကောင်စီပတ်ကင်းနဲ့ တွေ့ဆုံကာ ဖမ်းဆီးခံခဲ့ရတာပါ။
ကလေးမြို့ ပင်မသပိတ်ဟာ စစ်အာဏာသိမ်းပြီးချိန်ကစပြီး ပျက်ရက်မရှိ စစ်အာဏာရှင်စနစ်ကို ဆန့်ကျင်ဆန္ဒပြ တော်လှန်လာခဲ့ကြရာ ရက်ပေါင်း ၈၀၀ အထိ ဆန့်ကျင်ဆန္ဒပြခဲ့ကြတဲ့အဖွဲ့လည်း ဖြစ်ပါတယ်။
