ရှမ်းပြည်နယ်တောင်ပိုင်း၊ တောင်ကြီးမြို့မှာ မတ်လ ၁၅ ရက် ဒီနေ့မနက်ပိုင်း ပြုလုပ်တဲ့ PDF အလိုမရှိကြောင်း ဆန္ဒပြပွဲမှာ ပါဝင်ဆန္ဒပြဖို့ တောင်ကြီးမြို့တောင်ဘက်က ပအိုဝ်း ကိုယ်ပိုင်အုပ်ချုပ်ခွင့်ရ ဒေသတွင်းမှာရှိတဲ့ ကျေးရွာတွေကို တအိမ်တယောက် မလိုက်မနေရ ဆိုပြီး စစ်ကောင်စီလက်အောက်ခံ ပအိုဝ်း PNO ပြည်သူ့စစ်က ဖိအားပေးခိုင်းစေခဲ့တယ်လို့ ဒေသခံတွေထံက သိရပါတယ်။
အဆိုပါဆန္ဒပြပွဲမှာ ဆန္ဒပြလိုက်ပါဖို့အတွက် PNO ပြည်သူ့စစ်တွေက တောင်ကြီး-ကျောက်တလုံး လမ်းတလျှောက်က ကျေးရွာတွေကို တအိမ်တယောက် မလိုက်မနေရ ခေါ်နေတာဖြစ်ပြီး မလိုက်နိုင်တဲ့အိမ်က ဒဏ်ငွေ ၅၀,၀၀၀ ပေးဆောင်ဖို့ အတင်းအကျပ် ခိုင်းစေနေတယ်လို့ ဒေသခံကပြောပါတယ်။
ကျောက်တလုံးမြို့နယ်က ပအိုဝ်းဒေသခံတဦးက “တအိမ်တယောက် မလိုက်မနေရဆိုပြီး သတင်းထုတ်တာ၊ မလိုက်နိုင်ရင် ၅၀,၀၀၀ ပေးရမယ်တဲ့။ ဒီ ၅၀,၀၀၀ က ဘယ်သူကပေးနိုင်မှာလဲ။ ပြီးတော့ ဒီဒေသမှာက PNO က အမိန့်မနာခံရင် အငြိုးထားတာမျိုးတွေ လုပ်တာရှိတယ်။ PDF နဲ့ ပြည်သူကို သွေးခွဲတဲ့ကိစ္စပါပဲ” လို့ ပြောပါတယ်။
စစ်ကောင်စီနဲ့ PON က ဦးစီးပြီး PDF၊ KNDF၊ PNDF များအား အလိုမရှိကြောင်း ဆန္ဒပြပွဲကို ဒီနေ့ မတ်လ ၁၅ ရက် မနက်ပိုင်းက တောင်ကြီးမြို့ပြင် ကျောက်တလုံးလမ်းပေါ်က ပအိုဝ်းတပေါင်းကွင်းမှာ ပြုလုပ်ခဲ့ပြီး ဆန္ဒလာပြမယ့် ရွာသားတွေက မနက် ၉ နာရီ အရောက်လာဖို့ PNO ပြည်သူ့စစ်က အမိန့်ထုတ်ထားတယ်လို့ သိရပါတယ်။
