ထိုင်း-မြန်မာနယ်စပ်၊ တာ့ခ်ခရိုင်၊ ဖုပ်ဖရမြို့နယ်၊ ဆီရိရတ့်ဆဒွန်းကျေးရွာအုပ်စုထဲမှာ ဖေဖော်ဝါရီ ၆ ရက် ညနေပိုင်းက အသက် ၁ နှစ်ခွဲကျော် မြန်မာမိန်းကလေးငယ် ၁ ဦး မီတာ ၁၀၀ ကျော်နက်တဲ့ တွင်းကြီးထဲ ပြုတ်ကျသွားခဲ့ပါတယ်။
အသက် ၁ နှစ် ၇ လအရွယ်ရှိ သဉ္စာမိုးအေး ဆိုသူ ကလေးငယ်ဟာ မိခင်ဖြစ်သူ မအဌေး(အသက် ၂၀ နှစ်) တောင်ယာလုပ်နေတုန်း အနီးအနားမှာ မြေကြီးဆော့ကစားနေရင်း ၁ ပေပတ်လည်ရှိတဲ့ တွင်းဟောင်းကြီးတခုထဲ ပြုတ်ကျသွားတာပါ။
မိခင်ဖြစ်သူက အနီးနားတဝိုက်အော်ဟစ်အကူအညီတောင်းပြီးတဲ့နောက် တာ့ခ်ခရိုင်ဝန်ကိုယ်တိုင် ကယ်ဆယ်ရေးအဖွဲ့တွေကို ညွှန်ကြားခဲ့တဲ့အတွက် တာ့ခ်၊ မဲဆောက်နဲ့ ဖုပ်ဖရမြို့နယ်က ကယ် ဆယ်ရေးအဖွဲ့ ၅ ဖွဲ့ ရောက်လာပြီး ဘက်ဟိုးကားတွေနဲ့ အနက် ၁၃ မီတာထိ မြေတွေ တူးထုတ်ခဲ့ပါတယ်၊ ကလေးငယ်ရဲ့ ငိုသံတချက်တချက်ထွက်လာပြီး အသက်ရှူမပြတ်သွားအောင် အောက်ဆီဂျင်ပိုက်တွေလည်း မပြတ်လွှတ်ပေးနေခဲ့ပါတယ်။
ကယ်ဆယ်ရေးအဖွဲ့ဟာ မရပ်မနားဘဲ တညလုံး ကလေးငယ်ကိုရှာဖွေနေသလို မိဘနဲ့ အနီးနားက ရွှေ့ပြောင်းလုပ်သားတွေ၊ ရွာသားတွေလည်းတွင်းနားမှာ မျှော်လင့်ချက်တွေနဲ့ လာရောက် စောင့်ဆိုင်းနေပါတယ်။
ကလေးငယ်ပြုတ်ကျပြီး အချိန် ၁၇ နာရီအကြာ ဖေဖော်ဝါရီ ၇ ရက် မနက် ၉ နာရီကျော်မှာတော့ တွင်းအနက် ၁၅ မီတာမှာ မြေကြီးထဲတစ်နေတဲ့ ကလေးကိုစတွေ့ခဲ့ကာ ဒီမနက် ၉ နာရီ ၅၅ မိနစ်မှာတော့ ကလေးငယ်ကို အသက်ရှင်လျက် အပေါ်ကို ကယ်ထုတ်နိုင်ခဲ့ပါတယ်။
ကယ်ဆယ်ရေးအဖွဲ့က ကလေးကိုပွေ့ချီထွက်လာချိန်မှာ မိဘနှစ်ပါး ဝမ်းသာစွာငိုကြွေးပြီး ရွာသား နဲ့အလုပ်သမားတွေလည်း လက်ခုပ်တီးကာ ကယ်ဆယ်ရေးအဖွဲ့ကို ကျေးဇူးတင်စွာဂုဏ်ပြုခဲ့ ပါတယ်။ ကလေးငယ်ဟာ လက်ရှိ ဖုပ်ဖရဆေးရုံကြီးမှာ ဆေးကုသမှုခံယူနေပါတယ်။
