ရခိုင်ပြည်နယ်၊ စစ်တွေမြို့နယ်မှာ အောက်တိုဘာ ၂၅ ရက် ညနေပိုင်းက အသက် ၄၀ ကျော် ဒေသခံပြည်သူ အမျိုးသားတယာက်ကို ရခိုင်ပြည်လွတ်မြောက်ရေးပါတီ ALP/ALA အဖွဲ့က ဖမ်းဆီးထားတယ်လို့ ဖမ်းဆီးခံရသူရဲ့ ဆွေမျိုးတော်စပ်သူတွေဆီကနေ သိရပါတယ်။
စစ်တွေမြို့ ရွာသာယာရွာက ဦးအောင်လှဝင်းကို နာဇီရွာ စက်ရုံစုရပ်ကွက်မှာ အထိုင်ချထားတဲ့ ရခိုင်ပြည်လွတ်မြောက်ရေးပါတီ ALP/ALA အဖွဲ့ဝင်တွေက ဖမ်းဆီးထားတယ်လို့ ဦးအောင်လှဝင်းရဲ့ သားဖြစ်သူက ပြောပါတယ်။
“ညနေ ၆ နာရီလောက်မှာ ဘေးတွဲဆိုင်ကယ်တစီးနဲ့အတူ ပျောက်ဆုံးသွားလို့ လိုက်လံရှာဖွေရာ ဒီနေ့ အောက်တိုဘာလ ၂၆ ရက်နေ့ မနက်ပိုင်းမှာ ALP ရုံးမှာ ဖမ်းဆီးထားတယ်လို့ စုံစမ်းသိရတယ်။ ကျနော့်အဖေက အရက်သေစာလည်း သောက်လေ့မရှိဘူး။ ဘာကြောင့် ဖမ်းတယ် ဆိုတာတော့ မသိရသေးဘူး။ အဖေက ကားဂိတ်မှာ ဘေးတွဲမောင်းတဲ့ အလုပ်လုပ်ကိုင်ပြီး အိမ်ကိုပြန်တဲ့အချိန် ဖမ်းဆီးထားတာ။”
စစ်တွေမြို့ နာဇီရွာမှာ အောက်တိုဘာ ၉ ရက် နေ့လယ်ပိုင်းကလည်း ရခိုင်အမျိုးသားလွတ်မြောက်ရေးပါတီ ALP/ALA အဖွဲ့ဝင်တွေက ပြည်သူ ၂ ယောက်ကို သေနတ်နဲ့ ပစ်ခတ်ဖမ်းဆီးခဲ့လို့ ဒဏ်ရာအပြင်းအထန်ရရှိကာ သေနတ်ဒဏ်ရာ ၄ ချက် ထိမှန်ခဲ့တဲ့သူကိုတော့ ရန်ကုန်ဆေးရုံကို လွှဲပြောင်းကုသနေရတယ်လို့ မိသားစုဝင်တွေဆီကနေ သိရပါတယ်။
အဲဒီ ALP အဖွဲ့ဝင်တွေဟာ စစ်ကောင်စီနဲ့ပူးပေါင်းပြီး လက်နက်အားကိုးနဲ့ အပြစ်မဲ့ ပြည်သူတွေကို မတရားဖမ်းဆီးနှိပ်စက်တာတွေ၊ ရက္ခိုင်အမျိုးသားအဖွဲ့ချုပ်/ရက္ခိုင့်တပ်တော် ULA/AA နဲ့ ပတ်သက်ဆက်နွှယ်တဲ့သူတွေကိုလည်း စစ်ကောင်စီကို သတင်းပေးတာတွေ ဆက်တိုက်ပြုလုပ်နေကြတယ်လို့ သိရပါတယ်။
