ရခိုင်ပြည်နယ်၊ ပုဏ္ဏားကျွန်းမြို့နယ်မှာ ရက္ခိုင့်တပ်တော် (အေအေ) နဲ့ ဆက်စပ်တယ်ဆိုပြီး အကြမ်းဖက်မှုတိုက်ဖျက်ရေး ဥပဒေပုဒ်မတွေနဲ့ တရားစွဲခံထားရတဲ့ ကျောက်ဆိပ်ကျေးရွာသား ၅ ယောက်ကို စစ်တွေခရိုင် တရားရုံးက ဇူလိုင် ၆ ရက်မှာ အလုပ်ကြမ်းနဲ့ ထောင်ဒဏ် ၃ နှစ်စီ ချမှတ်လိုက်တယ်လို့ မိသားစုဝင်တွေက ပြောပါတယ်။
“စစ်တွေခရိုင်တရားရုံးက ဒီနေ့ အမှုဆုံးဖြတ်တာပါ။ ၅ ဦးစလုံး အလုပ်ကြမ်းနဲ့ ထောင်ဒဏ် ၃ နှစ်စီ ချမှတ်လိုက်ပါတယ်။”လို့ မိသားစုဝင် တယောက်က ပြောပါတယ်။
ထောင်ဒဏ်ချမှတ်ခံရသူတွေဟာ ပုဏ္ဏားကျွန်းမြို့နယ် ကျောက်ဆိပ်ကျေးရွာက ကိုမောင်ဌေးဝင်း၊ ကိုညီညီအောင်၊ ကိုမျိုးလင်းဦး၊ ပုဏ္ဏားကျွန်းမြို့ပေါ် အလယ်စုရပ်ကွက်က ဦးမင်းစိုးနဲ့ မြောက်ဦးမြို့နယ် ဇီးပင်ကြီးကျေးရွာက ကိုကျော်ဝင်းဟိန်းတို့ဖြစ်ကြပါတယ်။
ရွာသား သုံးယောက်ဟာ ဖမ်းဆီးခံရစဉ် ညှဉ်းပန်းနှိပ်စက်ခံခဲ့ရပြီး ၂ နှစ်ကျော်ကြာ အမှုရင်ဆိုင်ပြီးမှ အခုလို ထောင်ဒဏ်ချမှတ်ခံလိုက်ရတာ တရားမျှတမှု လုံးဝမရှိဖြစ်နေတယ်လို့ နိုင်ငံရေးအကျဥ်းသားဟောင်း စာရေးဆရာ ဝေဟင်အောင်က ပြောပါတယ်။
“ဒီလူတွေက အရပ်သားတွေဖြစ်နေတယ်။ ညှဥ်းပန်းနှိပ်စက်ခံခဲ့ကြရတာလည်း မှန်ကန်နေတယ်။ ဒီလူတွေက ၂ နှစ်ကျော်အထိ တရားရင်ဆိုင်လာခဲ့ကြရပြီးမှ အခုလို ထောင်ဒဏ်ချလိုက်တာက တရားမျှတမှု လုံးဝမရှိဘူးဖြစ်နေတယ်။”
သူတို့ဟာ စစ်ရေယာဉ်ပေါ်မှာလည်း စစ်သားတွေရဲ့ ဝိုင်းဝန်းနှိပ်စက်တာကို ခံခဲ့ရသလို ရက္ခိုင့်တပ်တော် (အေအေ) နဲ့ ဆက်စပ်တယ်ဆိုပြီး ပြီးခဲ့တဲ့ ၂၀၂၀ ခုနှစ် ဧပြီလကတည်းက အကြမ်းဖက်မှုတိုက်ဖျက်ရေး ဥပဒေပုဒ်မ ပုဒ်မ- ၅၀ (ည)၊ ၅၂ (က) တို့နဲ့ ခလရ - ၅၅၀ တပ်ရင်းက ဗိုလ်ကြီးတင့်နိုင်ထွန်းက တရားလိုလုပ်ပြီး တရားစွဲဆိုခဲ့တာလည်း ဖြစ်ပါတယ်။
