ဧရာ၀တီတိုင်း၊ မအူပင်မြို့၊ မြို့ရှောင်လမ်းမှာ ဖွင့်လှစ်ထားတဲ့ New Talent Industrial အထည်ချုပ်စက်ရုံမှာ အလုပ်သမားအခွင့်အရေး ချိုးဖောက်ခံရမှုတွေ ရှိနေတယ်လို့ အလုပ်သမားတွေထံက သိရပါတယ်။
အထည်ချုပ်စက်ရုံကို ၂၀၂၂ ခုနှစ် နှစ်ဆန်းပိုင်းမှာ စတင်ဖွင့်လှစ်ခဲ့ပြီး အလုပ်သမားတွေကို လုပ်ခ လစာ ၁ လကျော်မှ ပေးတာတွေ ရှိသလို လုပ်ငန်းခွင်မှာ ဆဲဆိုတာတွေပါ ပြုလုပ်နေတာလို့ ဒေသခံ အလုပ်သမားတွေက ပြောပါတယ်။
“အလုပ်သမားတွေကို ၁ လကျော်ကြာမှ လစာပေးတယ်။ ပြီးတော့ လုပ်ငန်းခွင်မှာ အလုပ်သမားတွေကို ဆဲဆိုတာတွေပါ ခံနေရတာ။ သူတို့က မြန်မာနိုင်ငံလာပြီး လုပ်ချင်တိုင်း လုပ်နေကြတာ”လို့ ဒေသခံ အလုပ်သမားတဦးက ပြောပါတယ်။
အလုပ်သမားတွေအခွင့်အရေး ချိုးဖောက်ခံနေရတာနဲ့ ပတ်သက်ပြီး တိုင်စရာနေရာမရှိတာကြောင့် စက်ရုံက နိုင်ငံခြားသားတွေ ဆဲဆိုသမျှကို ခံနေရတယ်လို့ ဆိုပါတယ်။
စစ်အာဏာသိမ်းပြီးနောက်ပိုင်း စားဝတ်နေရေး ကျပ်တည်းလာတာကြောင့် စက်ရုံက အလုပ်စခေါ်ချိန်မှာ အလုပ်လာလျှောက်သူ များပြားပြီး လုပ်ငန်းခွင်ထဲရောက်မှ ခုလို ဆဲဆိုတာမျိုးတွေ၊ အလုပ်သမားအခွင့်အရေး ချိုးဖောက်ခံရတာတွေ ရှိနေတာလို့ သိရပါတယ်။
အလုပ်သမားအခွင့်အရေး ချိုးဖောက်ခံနေရမှုများနဲ့ပတ်သက်ပြီး စက်ရုံ ဖုန်းကို အကြိမ်ကြိမ် ဆက်သွယ်မေးမြန်းခဲ့ပေမဲ့ ဆက်သွယ်လို့ မရခဲ့ပါဘူး။
