မကွေးတိုင်း၊ ရေစကြိုမြို့နယ်မှာ ဧပြီ ၆ ရက်က စစ်ကောင်စီတပ်တွေ စစ်ကြောင်းထိုးနေတဲ့ကြားက ရေစကြိုမြောက်ပိုင်းပြောက်ကျားတပ်ဖွဲ့ N-YSO အထူးကွန်မန်ဒိုသင်တန်းဆင်းပွဲ ပြုလုပ်ခဲ့ပါတယ်။
အဲဒီသင်တန်းကို သင်တန်းသား ၄၀ ကျော်၊ သင်တန်းသူ ၂၀ ကျော် စုစုပေါင်း ၇၀ ယောက်တက်ရောက်ပြီး သင်တန်း ကာလ ၁ လ သင်ကြားပို့ချပေးခဲ့တာလို့ N-YSO ပြောက်ကျားတပ်ဖွဲ့ရဲ့ ပြန်ကြားရေးတာဝန်ခံက ဒီဗွီဘီကိုပြောပါတယ်။
“ကျနော်တို့ဆီမှာ ပြည်သူ့ကာကွယ်ရေးတပ်ဖွဲ့ဝင် အင်အားတွေ တနေ့တခြားတိုးလာပေမဲ့ လက်နက်အင်အား ပြည့်စုံမှုမရှိလို့ မိဘပြည်သူတွေအနေနဲ့ တတ်နိုင်သရွေ့ ပူးပေါင်းပါဝင်ပေးဖို့ လိုအပ်ပါတယ်။”
N-YSO သင်တန်းဆင်း ရဲဘော်တွေအနေနဲ့ ပြည်သူကမွေးတဲ့ ပြည်သူ့သွေးသားတွေ ဖြစ်တာကြောင့် ပြည်သူ့ အသက်အိုးအိမ်စည်းစိမ်ကို ကာကွယ်စောင့်ရှောက်ကာ စစ်အာဏာရှင် ကျဆုံးတဲ့အထိ တိုက်ပွဲဝင်သွားမယ်ဆိုပြီး ကတိသစ္စာပြုခဲ့ကြတယ်လို့ ပြောပါတယ်။
ရေစကြိုမြို့နယ်ထဲမှာ ဧပြီ ၂ ရက်ကစလို့ စစ်ကောင်စီတပ်တွေ အင်အားအလုံးအရင်းနဲ့ စစ်ကြောင်းထိုးနေပြီး အပြစ်မဲ့ ပြည်သူတွေကို ဖမ်းဆီးသတ်ဖြတ်ကာ နေအိမ်တွေကို မီးရှို့ ဖျက်ဆီးတာတွေ ဆက်တိုက်ကျူးလွန်နေတယ်လို့ သိရပါတယ်။
