အန်စီအေ လက်မှတ်ရေးထိုးထားတဲ့ တိုင်းရင်းသား လက်နက်ကိုင်အဖွဲ့အစည်းတွေရဲ့ ငြိမ်းချမ်းရေးလုပ်ငန်းစဉ် ဦးဆောင်အဖွဲ့  PPST ရဲ့ စတုတ္ထအကြိမ်မြောက်  ထိပ်သီးညီလာခံ (ဒုတိယအပိုင်း)ကို ဒီရက်ပိုင်းအတွင်းမှာ ပြုလုပ်ဖို့ရှိပေမယ့် ထိုင်းအာဏာပိုင် အဖွဲ့အစည်းတွေက လူသိရှင်ကြားမလုပ်ဖို့ ပြောထားတယ်လို့ သိရပါတယ်။

အခုပြုလုပ်မယ့် ညီလာခံဟာ ထူးခြားမှုတွေရှိလာနိုင်သလို ရှုပ်ထွေးမှုတွေမဖြစ်ပေါ်လာဖို့အတွက်  ညီလာခံနဲ့ပတ်သတ်တဲ့အကြောင်းအရာတွေကို ကြိုတင်ထုတ်ဖော်မပြောဆိုဖို့ အဖွဲ့အစည်းအကြီးအကဲတွေက ပြောဆိုထားတယ်လို့လည်း PPST ဦးဆောင်မှုအလုပ်အဖွဲ့ အဖွဲ့ဝင် ဗိုလ်မှူးကြီး ခွန်ဥက္ကာကပြောပါတယ်။

PPST ရဲ့ စတုတ္ထအကြိမ်မြောက် ဒုတိယအပိုင်း ထိပ်သီးညီလာခံမှာ တိုင်းရင်းသားပေါင်းစုံပါတဲ့ ညီလာခံကျင်းပနိုင်ရေးကိစ္စအပြင် နိုင်ငံရေးလမ်းပြမြေပုံနဲ့ EAOs တွေရဲ့ စုဖွဲ့မှုပုံစံအသစ်တွေကို ဆွေးနွေးဖို့ရှိနေပါတယ်။ 

အန်စီအေ အပစ်ရပ်လက်မှတ်ထိုးထားတဲ့ တိုင်းရင်းသားတော်လှန်ရေးလက်နက်ကိုင်အဖွဲ့တွေရဲ့  PPST စတုတ္ထအကြိမ်မြောက်  ထိပ်သီးညီလာခံ (ပထမအပိုင်း)ကို ၂၀၁၉ ခုနှစ် မေလ ၁၄ ရက်မှ ၁၈ ရက်နေ့အထိ ထိုင်းနိုင်ငံ ချင်းမိုင်မြို့မှာ ကျင်းပခဲ့ပါတယ်။