မြန်မာနိုင်ငံ မြစ်ဝကျွန်းပေါ်ဒေသကို ဦးတည်လာတဲ့ မုန်တိုင်းကြောင့် ဧရာဝတီတိုင်း၊ လပွတ္တာမြို့နယ်က ကျေးရွာတွေမှာ  မတ်လ ၂၂ ရက် ဒီနေ့ မွန်းလွဲပိုင်းက စတင်ကာ ဒီရေတက်တာတာကြောင့် ဒေသခံတွေ ဘေးလွတ်ရာမှာ တိမ်းရှောင်နေကြရပါတယ်။ 

ဒီရေတွေတက်လာချိန်မှာ မုန်တိုင်းရှောင်ဖို့ ပြုလုပ်ထားတဲ့ Cyclone Shelter မသွားနိုင်တော့တဲ့ ရေလုပ်သားမိသားစုတချို့ကတော့  နီးစပ်ရာသစ်ပင်တွေပေါ် လင့်စင်တွေထိုးပြီး နေခဲ့ကြရတယ်လို့ ဒေသခံတွေက ပြောပါတယ်။

“သူတို့က မုန်တိုင်းရှောင်ဖို့မသွားတော့တာ ဝေးတာလည်း ပါတယ်။ ရေတက်လာတော့ သစ်ပင်တွေမှာ လင့်စင်ထိုးနေတာ သိရသလောက်က ရေလုပ်သားတွေဆိုတော့ ပြန်ရောက်တာ နောက်ကျလို့ မရှောင်တော့တာလို့လည်း သိရတယ်။ အားလုံး မိသားစု ၅ စုလောက်တော့ရှိမယ်။ မိသားစုလိုက် သစ်ပင်ပေါ် တက်နေကြတာ”လို့ လပွတ္တာမြို့ခံတဦးက ပြောပါတယ်။

ပင်လယ်နဲ့နီးတဲ့ဒေသဖြစ်တာကြောင့် မြစ်ဝကျွန်းပေါ်ဒေသကို မုန်တိုင်းဖြတ်ချိန်မှာ ရွာထဲ ရေတက်လာပြီ အိမ်နစ်မြုပ်ခါနီးလောက်မှာ သစ်ပင်ပေါ် ရွှေ့ပြောင်းခဲ့ကြတာလို့ ဆိုပါတယ်။ 

လပွတ္တာမြို့ပေါ်က မုန်တိုင်းရှောင်စခန်းတွေမှာ မတ်လ ၂၁ ရက်နေ့က စတင်ကာ မတ်လ ၂၂ ရက်နေ့ထိ မုန်တိုင်းလာရှောင်တဲ့ပြည်သူ ၂၀၀၀ လောက်ထိရှိတယ်လို့ သိရပါတယ်။

လက်ရှိအချိန်ထိ ဧရာဝတီတိုင်းကို မုန်တိုင်းဖြတ်ကျော်ဝင်ရောက်သွားချိန်မှာ သစ်ပင်လဲတာတွေ၊ အိမ်ပြိုတာတွေ၊ စေတီထီးတော် မြေခတာတွေ ရှိခဲ့ပေမဲ့ လူသေဆုံးတာတော့ မရှိခဲ့ဘူးလို့ ဒေသခံတွေဆီက သိရပါတယ်။