စစ်ကိုင်းတိုင်း၊ ရွှေဘိုခရိုင်၊ ရွှေဘိုမြို့နယ် အရှေ့ဘက် အိမ်ခြေ ၁၉၀ ဝန်းကျင်ခန့်ရှိတဲ့ ငါးပိအိုးကျေးရွာကို စစ်ကောင်စီ တပ်သားတွေက ဖေဖော်ဝါရီ ၂၄ ရက် ည ၉ နာရီကျော် လက်နက်ကြီးတွေနဲ့ ရမ်းသမ်းပစ်ခတ် ဝင်ရောက်ခဲ့တာကြောင့် ရွာသား ၂ ဦး လက်နက်ကြီးထိမှန် သေဆုံးသွားတယ်လို့ ဒေသခံတစ်ဦးက ဒီဗွီဘီကို ပြောပါတယ်။
စစ်ကောင်စီတပ်ဟာ ဖေဖော်ဝါရီလ ၂၄ ရက် ည ၁၀ နာရီဝန်းကျင်မှာ ရွာကို မီးစတင်ရှို့ခဲ့တာကြောင့် အိမ်ခြေ ၁၀၀ ကျော် မီးလောင်ပြာကျသွားခဲ့ပြီး အိမ်မွေး တိရစ္ဆာန်ဖြစ်တဲ့ နွားနဲ့ ဝက်တွေအများအပြား သေဆုံးသွားတယ်လို့ သိရပါတယ်။
ဒါ့အပြင် ဖေဖော်ဝါရီ ၂၅ ရက် မနက် ၆ နာရီအချိန်ကလည်း ရွှေဘိုမြို့ အနောက်ဘက်ရှိ နှမစားရစ်ကျေးရွာကို စစ်ကောင်စီ တပ်သားတွေရောက်လာပြီး မီးရှို့ဖျက်ဆီးခဲ့တာကြောင့် အခုအချိန်ထိ မီးမငြိမ်းသေးဘူးလို့ သိရပါတယ်။
စစ်ကောင်စီတပ်သားတွေဟာ ရွှေဘိုမြို့နယ်ထဲက ကျေးရွာတွေကို ရုတ်တရက်ဝင်ရောက်ပြီး ပြည်သူတွေကို သတ်ဖြတ်တဲ့အပြင် ကျေးရွာတွေကို မီးရှို့နေတာကြောင့် ဒေသခံတွေ ထွက်ပြေးတိမ်းရှောင်နေကြရပါတယ်။
