စစ်ကိုင်းတိုင်း ဥပဒေချုပ်ကို စစ်ကောင်စီက ထောင်ဒဏ် ၂ နှစ်ချ
DVB
·
December 17, 2021
စစ်ကိုင်းတိုင်းဥပဒေချုပ် ဦးခင်မောင်လှကို စစ်ကောင်စီက စွဲဆိုထားတဲ့ ရာဇသတ်ကြီး ဥပဒေ ပုဒ်မ ၅၀၅ (ခ) အမှုအတွက် ဒီဇင်ဘာ ၁၇ ရက်နေ့မှာ ထောင်ဒဏ် ၂ နှစ် အမိန့်ချလိုက်တယ်လို့ နီးစပ်သူတစ်ဦးက ပြောပါတယ်။
တိုင်းဥပဒေချုပ်ဦးခင်မောင်လှကို စစ်ကောင်စီက အာဏာဖီဆန်ရေး CDM လှုပ်ရှားမှုမှာ နိုင်ငံ့ဝန်ထမ်းတွေအနေနဲ့ ပါဝင်ပေးဖို့ တိုက်တွန်းခဲ့တယ်ဆိုတဲ့ စွပ်စွဲချက်နဲ့ ပုဒ်မ ၅၀၅ (ခ) နဲ့ ဒီနေ့ မုံရွာအကျဉ်းထောင်တရားရုံး ထောင်ဒဏ် ၂ နှစ် အမိန့်ချလိုက်တာလို့ ဆိုပါတယ်။
စစ်တပ်က အာဏာသိမ်းတဲ့ ဖေဖော်ဝါရီ ၁ ရက်နေ့ကတည်းက စစ်ကိုင်းတိုင်း ဝန်ကြီးချုပ်နဲ့ ဥပဒေချုပ်အပါအဝင် ဝန်ကြီးတချို့ကို မုံရွာထောင်မှာ ဖမ်းဆီးထိန်းသိမ်းထားပြီး နိုင်ငံတော်အကြည်ညိုပျက်စေမှု ပုဒ်မ ၅၀၅ (ခ) နဲ့ အမှုဖွင့်စစ်ဆေးနေတာလို့ သိရပါတယ်။
