မန္တလေးတိုင်း၊ မတ္တရာမြို့၊ အမှတ် (၂) ရပ်ကွက်မှာ နေထိုင်တဲ့ CDM ကျောင်းဆရာ၊ ဆရာမ ဇနီးမောင်နှံကို နိုဝင်ဘာ ၁၂ ရက် ည ၁၂ နာရီလောက်မှာ စစ်တပ်က အင်အားအလုံးအရင်းနဲ့ ဝင်ရောက် ရိုက်နှက်ဖမ်းဆီးသွားတယ်လို့ မြို့ခံတွေဆီက သိရပါတယ်။
ဖမ်းဆီးခံရသူတွေဟာ အ.ထ.က စလွန်ဖြူမှာ တာဝန်ထမ်းဆောင်ခဲ့တဲ့ (အထက်တန်းပြ)ဆရာ ဦးငြိမ်းသူအောင်နဲ့ သူ့ရဲ့ဇနီး အထက မြို့သစ်ကျောင်းမှာ တာဝန်ထမ်းဆောင်ခဲ့တဲ့ ဆရာမ ဒေါ်မေသူအေး တို့ ဖြစ်ပါတယ်။
သူတို့ရဲ့နေအိမ်ကို စစ်ကောင်စီတပ်က အင်အားအလုံးအရင်းနဲ့ ဝင်ရောက် လာကာ ရိုက်နှက်ဖမ်းဆီးသွားတာဖြစ်ပြီး ၇ နှစ်အရွယ် သားလေးကိုတော့ သူ့အဘိုး အဘွားတွေနဲ့ ထားခဲ့ရတယ်လို့ သိရပါတယ်။
ဘဝတူ CDM တွေနဲ့ ဆွေမျိုးသားချင်း မိဘဘိုးဘွားတွေကတော့ ဆရာနဲ့ ဆရာမတို့နှစ်ယောက်ရဲ့ အသက်အန္တရာယ်ကို တစုံတရာဖြစ်မှာ စိုးရိမ်ပူပန်နေကြတယ်လို့ ဆိုပါတယ်။
မတ္တရာမြို့နယ်မှာ အခြေခံပညာ စာသင်ကျောင်းပေါင်း ၂၀၂ ကျောင်းရှိပြီး၊ ပညာရေးဝန်ထမ်း ၂၃၀၀ ကျော်ရှိကာ CDM ပြုလုပ်သူ ဆရာ၊ ဆရာမ ၁၂၀၀ ကျော်ရှိတယ်လို့ သိရပြီး စစ်ကောင်စီက ဖမ်းဆီးတာခံခဲ့ရသူ ၈ ဦးရှိပါတယ်။
