စစ်ကောင်စီတပ်တွေလုံခြုံရေးတင်းကျပ်ထားတဲ့ နေပြည်တော်နယ်မြေ ဥတ္တရသီရိမြို့နယ်၊ ချင်းရွာမှာရှိတဲ့ မြို့နယ်လျှပ်စစ် (EPC) ရုံးမှာ နိုဝင်ဘာ ၆ ရက် ဒီနေ့လယ်ပိုင်းက ဗုံးပေါက်ကွဲခဲ့တယ်လို့ သိရပါတယ်။
ဒေသခံတဦးက “ရုံးဝင်းထဲမှပေါက်တာ။ ဘာတွေပျက်စီးလဲတော့ မသိသေးဘူး။ မီတာခတွေ အတင်းဆောင်ခိုင်းနေတာ။ ကျနော်ကတော့ မဆောင်ဘူး။ ပြည်သူတွေကလည်း မီးဖြတ်ခံရမှာ ကြောက်တော့ ဆောင်နေကြတယ်” လို့ ပြောပြပါတယ်။
အဆိုပါ ဗုံးဖောက်ခွဲမှုကို ဗီးနစ်မြို့ပြပြောက်ကျားတပ်ဖွဲ့က လုပ်ဆောင်ခဲ့တာ ဖြစ်တယ်လို့ တာဝန်ခံက အတည်ပြုပြောဆိုပါတယ်။
ဗုံးပေါက်ကွဲမှုနဲ့ပတ်သက်ပြီး အသေးစိတ်သိရှိနိုင်ဖို့ ဥတ္တရသီရိမြို့နယ်လျှပ်စစ်ရုံးကို ဆက်သွယ်မေးမြန်းခဲ့ပေမယ့် ဖုန်းလက်ခံဖြေဆိုခြင်းမရှိသလို စစ်သားတွေနဲ့ရဲအများအပြား အဆိုပါရုံးဝင်းထဲရောက်ရှိနေတယ်လို့ ဒေသခံတွေရဲ့ပြောပြချက်အရ သိရပါတယ်။
ပြီးခဲ့တဲ့ နိုဝင်ဘာလ ၁ ရက်နေ့ကလည်း နေပြည်တော်၊ တပ်ကုန်းမြို့နယ် လျှပ်စစ်ရုံးမှာ ဗုံး ၁ လုံး ပေါက်ကွဲခဲ့ပါတယ်။
