မန္တလေးမြို့ မဟာအောင်မြေမြို့နယ် ၉၁ လမ်း ၄၁ လမ်းထောင့်မှာ ဒီနေ့မနက် စစ်အာဏာရှင် ဆန်ကျင်ရေးထိုင်သပိတ်ကို စစ်တပ်နဲ့ရဲတပ်ဖွဲ့က အကြမ်းဖက်ပစ်ခတ် ဖြိုခွင်းမှုကြောင့် ၃ ဦး ကျဆုံးပြီး ၁၅ ဦးထက်မနည်း ဖမ်းဆီးခံခဲ့ရတယ်လို့ သိရပါတယ်။
လုနာတင်ယဉ်ပေါ်ပါလာတဲ့ လူငယ်တဦးက “ထိုင်သပိတ်လုပ်နေကြတဲ့ လူငယ်တွေက အတော်သတ္တိကောင်းကြတယ်။ သူတို့ထိုင်သပိတ်လုပ်နေတုန်း မကြာဘူး မီးခိုးဗုံးတွေနဲ့ပစ်၊ သေနတ်တွေနဲ့ ဒလစပ်ပစ်ခတ်တာပဲ၊ တက်လာတာ မြင်မကောင်းဘူး။ ပြေသံလွှားသံတွေ၊ အားလို့အော်သံတွေ၊ ဒီမှာထိပြီ ဟိုမှာလည်း တယောက်နဲ့ မြင်မကောင်းဘူး။ ကားပေါ်အတင်းဆွဲတင်သွားတာ ၁၅ ယောက်လောက်တော့ရှိမယ်။ လူနာတင်ယဉ်တွေကတော့ မနားတမ်း တင်လိုက်သွားလိုက်နဲ့။ သေဆုံးတာက သုံးယောက်ရှိပြီ၊” လို့ ပြောပါတယ်။
အတော်ရက်စက်ကြတဲ့ မြင်ကွင်းပဲလို့ အခင်းဖြစ်နေရာက မျက်မြင်ဦးလေးကြီးတဦးက ပြောပါတယ်။
“အမျိုးသမီး တစ်ယောက် ခေါင်းထိထားလို့ သွားကယ်တာ၊ လုံးဝ အကယ်မခံပါဘူး။ သွားကယ်တဲ့လူတွေကို သေနတ်နဲ့ထပ်ပစ်တယ်။ ဘုန်းကြီး တစ်ပါးလည်း သေနတ် မှန်ထားပါတယ်။ အာဏာသိမ်းစစ်တပ်က မီးစက်ကြီးကိုလည်း ဘူဒိုဇာနဲ့လှန်သွားတာ ဦးလေးရှေ့မှာ”
စစ်အာဏာရှင်အလိုမရှိကြောင်း မဟာအောင်မြေမြို့နယ် ထိုင်သပိတ်မှာ ပြည်သူတွေ၊ ရဟန်သံဃာတွေ၊ ကျောင်းသား ကျောင်သူတွေ၊ ဌာနဆိုင်ရာပေါင်းစုံက ဝန်ထမ်းတွေ စုစုပေါင်း ၁၀၀၀ လောက်ရှိတယ်လို့ သိရပါတယ်။
