ရှမ်းပြည်တောင်ပိုင်း လွိုင်လင်မြို့နဲ့ ပင်လုံမြို့က ဒေသခံတွေ ပူးပေါင်းပြီး စစ်အာ ဏာရှင်ကျဆုံးရေးအတွက် နေ့စဉ် ဆန္ဒပြနေကြရာမှာ ဒီကနေ့ မတ်လ ၈ ရက်မှာတော့ ရဲနဲ့စစ်တပ်က လူ ၁၃ ဦးထက်မနည်းကို ဖမ်းဆီး သွားကြပါတယ်။
လုံခြုံရေးတပ်ဖွဲ့ဝင်တွေဟာ ဆန္ဒပြသူတွေရှေ့ကို လာရောက်ကာ ဟန့်တားခဲ့ကြောင်း၊ အဲဒီနောက် တားထားတဲ့နေရာကို ဆိုင်ကယ်နဲ့ဝင်သွားတဲ့ အမျိုးသမီး ၂ ဦးကို အရင်ဖမ်းဆီးပြီး သပိတ်စစ်ကြောင်း ကွဲသွားပေမယ့် ထွက်ပြေးတဲ့လူတွေကို လိုက်လံဖမ်ဆီးရာမှာ ဆိုင်သူတွေရော မဆိုင်သူတွေပါ အနည်းဆုံး ၁၃ ယောက် ပါသွားတယ်လို့ ဆန္ဒပြ ကျောင်းသူတစ်ဦးက ဒီဗွီဘီကို ပြောပါတယ်။
“ပင်လုံကအထွက် လွိုင်လင်မြို့အဝင်မှာ ရဲတွေက ဒီနေ့အဖို့ ဆန္ဒမပြပါနဲ့လို့ လာတားတယ်။ အဖွဲ့ထဲမှာ တချို့ကလည်း နောက်နေ့မှ ပြရအောင်တဲ့၊ တချို့က အခုအလျှော့ ပေးရင် နောက်လည်းအမြဲအလျှော့ပေးရမှာဘဲဆိုပြီးညှိနှိုင်းရင်းနဲ့ ထိုင်သပိတ်လုပ်လိုက်ကြတယ်။ အဖွဲ့ထဲမှာ လွိုင်လင်က ၂ ယောက်ပါလာပြီး သူတို့က အိမ်ပြန်မယ်ဆိုပြီး ဆိုင်ကယ်နဲ့ တားထား တဲ့ နေရာကို ဖြတ်မောင်းတော့ အဲဒီမှာစအဖမ်းခံရတာပါပဲ။ သူတို့ကို ပြန်လွှတ်ပေးရင် ဒီနေ့ ဆန္ဒမ ပြဘူးလို့ ညှိနှိုင်းနေတုန်းမှာပဲအချုပ်ကားရောက်လာတယ် ၊ စစ်သားတွေလည်း ထပ်လာတယ် ၂၀ ကျော်ရှိမယ်။ ပြီးတော့ ဆန္ဒပြတဲ့လူတွေ ဖမ်းမလို့လုပ်တော့ ကျမတို့ အကုန် ဆိုင်ကယ်နဲ့ အသကုန်ထွက်ပြေးကြတယ်။ ကျမတို့က ခြံဝင်းတခါထဲဝင်ပုန်းပြီး ရဲကားတွေလွန်သွားမှ တခြားလမ်း အသိ အိမ်တွေဆီ လျှောက်သွားပြီးမှ အိမ်ကိုပြန်တယ်။ နောက်တော့ သူငယ်ချင်းတွေ ဖုံးဆက်လာတာ ၁၃ ယောက်အဖမ်းခံရတယ်တဲ့၊ တချို့က ဆန္ဒပြတဲ့ထဲမပါဘူး ၊ အချုပ်ကားနဲ့ ရဲကားတွေကပင်လုံ မြို့လယ်မှာရပ်ပြီး ဖြတ်သွားတဲ့လူတိုင်းကို တားပြီးစစ်တယ်။ သူတို့ဓာတ်ပုံရိုက်ထားတဲ့ ဆန္ဒပြ လူတွေရဲ့ပုံနဲ့ တိုက်ကြည့်ပြီး တူတယ်လို့ထင်ရင် ဖမ်းသွားတာတဲ့
လောလောဆယ် အဖမ်းခံရသူတွေကို ပြန်လွှတ်ပေးဖို့ ရှမ်းပြည်နယ်လုံးဆိုင်ရာ မဟာသံဃ နာယက ဆရာတော်ကိုယ်တိုင် ဦးဆောင်ပြီးသွားရောက်ညှိနှိုင်းနေပါတယ်။
အခုလို ခြိမ်းခြောက်ဖမ်းဆီးမှုတွေ ရှိနေပေမယ့် စစ်အာဏာရှင် မပြုတ်ကျမချင်းကိုတော့ ဆ က်လက်တိုက်ပွဲဝင်သွားမယ်လို့ ဆန္ဒပြအဖွဲ့ဝင်က ပြောသွားပါတယ်။
