မြန်မာ့ နွေဦးတော်လှန်ရေး အရေးအခင်းကာလမှာ ဆန္ဒပြသူတွေထဲက ထိခိုက် နာကျင်သူတွေကို အကူအညီပေးနိုင်ဖို့ ကြိုက်သလောက်ယူ ကြိုက်သလောက်ကူ စာအုပ်ရောင်းချတဲ့ အစီအစဉ်ကို မြစ်ကြီးနားမြို့ ကမ်းနားလမ်း ပြည်သူ့အားကစားကွင်းအနီးမှာ ဒီနေ့မနက် ပြုလုပ်ခဲ့ပါတယ်။
မြစ်ကြီးနားမြို့ခံ စာရေးဆရာတွေနဲ့ စာအုပ်စာပေချစ်မြတ်နိူးသူတွေ စုပေါင်းပြီး မိမိတို့မှာရှိတဲ့ စာအုပ်နဲ့ ပန်းချီကားအချို့ ကို ဆန္ဒထုတ်ဖော်ပွဲမှာ ထိခိုက်နာကျင်သူတွေအတွက် ကူညီဖို့ ရောင်းချခဲ့တာလို့ သိရပါတယ်။
မြစ်ကြီးနားမြို့ခံ စာရေးဆရာတစ်ဦးက "ဆန္ဒပြသူတွေထဲက ခဲမှန်တာ၊ ကျည်ဆန်မှန်တာမျိုးတွေ၊ ဒဏ်ရာရတာမျိုးတွေကို ကူညီဖို့ပါ။ နာကျင်သူတွေအတွက်ကူညီမယ်။ ဒါကြောင့် စာပေချစ်မြတ်နိူးသူတွေဆီက စာအုပ်တွေစုပြီး ရောင်းတာပါ။ ရောင်းချလို့ရတဲ့ ငွေတွေကိုတော့ နာကျင်သူတွေအတွက် အကူအညီပေးမှာပါ” လို့ ပြောပါတယ်။
ကြိုက်သလောက်ယူ ကြိုက်သလေက်ကူ စာအုပ်ရောင်းချတာကို မနက် ၉ နာရီကနေ နေ့လယ် ၂ နာရီအထိ ဒီနေ့ကစပြီး ၃ ရက်ရောင်းချမှာဖြစ်ပြီး ရသ၊ သုတ၊ နိုင်ငံရေး၊ စီးပွားရေး စာအုပ်တွေ ပါဝင်ကာ ဒီနေ့မှာတော့ စာအုပ်ရေ ၅၀၀ ကျော်လောက် ရောင်းချပေးခဲ့တယ်လို့ စာအုပ်ရောင်းချသူတွေဆီက သိရပါတယ်။
