ဖမ်းဆီးခံကျောင်းသူကို ချက်ချင်းလွှတ်ပေးရန် NMDC ကျောင်းသားသမဂ္ဂ တောင်းဆို
DVB
·
February 27, 2021
ရန်ကုန်မြို့၊ တာမွေအိုးရှင်းရှေ့ ရဲတပ်ဖွဲ့ရဲ့လူစုခွဲရာကနေ ဖေဖော်ဝါရီ ၂၇ ရက် မနက်က မတရားဖမ်းဆီးခံလိုက်ရတဲ့ အမျိုးသားစီမံခံ့ခွဲမှုပညာဒီဂရီကောလိပ် (NMDC) က သတင်းအတတ်ပညာ၊ တတိယနှစ်ကျောင်းသူ မရွှေရည်ပွင့်ဦးကို ချက်ချင်းလွှတ်ပေးဖို့ ကျောင်းသားသမဂ္ဂက တောင်းဆိုလိုက်ပါတယ်။
ဖမ်းဆီးခံကျောင်းသူဟာ ဆန္ဒပြရာမှာ ပါဝင်ခြင်းမရှိဘဲ တာမွေအိုးရှင်းဘေး အောင်ချမ်းသာ အိမ်ရာကိုလာရင်း လူစုကွဲပြီး မနက် ၁၀ နာရီခွဲလောက်က အဖမ်းခံခဲ့ရတာလို့ သူငယ်ချင်းဖြစ်သူက ပြောပါတယ်။ ဘယ်ကိုခေါ်သွားတယ်ဆိုတာ အဆက်အသွယ်မရရှိသေးပါဘူး။
ဖမ်းဆီးခံကျောင်းသူရဲ့ မိဘတွေ၊ ကျောင်းသားသမဂ္ဂနဲ့ ကျောင်းသား/သူတွေက တာမွေရဲစခန်းရှေ့မှာ ဝန်းရံခဲ့ပေမယ့် တစ်စုံတစ်ရာမထူးခြားလို့ လူစုခွဲခဲ့ပါတယ်။
လက်ရှိမှာ သမဂ္ဂအနေနဲ့ ရှေ့နေတစ်ယောက်နဲ့ ချိတ်ဆက်ထားပြီး အခြေအနေကို စောင့်ကြည့်နေဆဲပဲရှိတယ်လို့ သိရပါတယ်။
လွင်မိုးအောင်
