တိုကျိုကုလသမဂ္ဂရုံးရှေ့တွင် ဂျပန်ရောက်မြန်မာများ မီးတိုင်ထွန်းဆန္ဒပြ
ဇော်ဇော်လှိုင်
·
February 11, 2021
စစ်အာဏာသိမ်းမြန်မာစစ်တပ်ကို အမြန်ဆုံးအရေးယူပေးဖို့ ဂျပန်ရောက်မြန်မာနိုင်ငံသား၂၀၀၀ လောက်က တိုကျိုမြို့ရှိ ကုလသမဂ္ဂရုံးရှေ့မှာ ဒီကနေ့ ညပိုင်းက မီးထွန်းဆန္ဒပြ တောင်းဆိုခဲ့ကြပါတယ်။
တိုကျိုမြို့တော်အနီးတဝိုက်က လူငယ်အများအပြားလာခဲ့ကြပြီး မီးတိုင်များထွန်းကာ စစ်အာဏာရှင်ဆန့်ကျင်ရေးသီချင်းများကြွေးကြော်ခဲ့ကြပါတယ်။
ယိုကိုဟားမားမြို့မှာနေထိုင်သူ ဂျပန်တက္ကသိုလ်ကျောင်းသူ တဦးဖြစ်တဲ့ မဥမ္မာစိုးက “ဒေါ်အောင်ဆန်းစုကြည်အပါအဝင်ဖမ်းဆီးထားသူတွေ အမြန်လွှတ်မြောက်ပါစေလို့ ဆုတောင်းရင်း မြန်မာစစ်တပ်ကိုဆန့်ကျင်တာမှာ အမိမြန်မာပြည်က ပြည်သူတွေနဲ့ တသားတည်းရှိတာ ပြသချင်လို့ပါ လာရောက်ဆန္ဒပြတာပါ” လို့ ဒီဗွီဘီကို ပြောပါတယ်။
စစ်အာဏာရှင်ဆန့်ကျင်ရေး ဆန္ဒပြပွဲကို ညနေ ၆ နာရီမှ ည၉နာရီအထိ ၂ ရက်ပြုလုပ်မှာဖြစ်ပါတယ်။
