ချောက်မြို့တွင် CB ဘဏ်ခွဲဝန်ထမ်း ၂ ဦး ကိုဗစ်-၁၉ ပိုး ထပ်မံကူးစက်ခံရ
DVB
·
January 20, 2021
မကွေးတိုင်းဒေသကြီး၊ ချောက်မြို့မှာ ဇန်နဝါရီ ၁၉ ရက်မနက်ပိုင်းက CB ဘဏ်ခွဲ ဝန်ထမ်း အမျိုးသား နှစ်ယောက် ကိုဗစ်-၁၉ ပိုးထပ်မံစစ်ဆေးတွေ့ခဲ့ရလို့ ကိုဗစ်-၁၉ ကူးစက်ခံရတဲ့ ဘဏ်ဝန်ထမ်း ၄ ယောက်အထိ ရှိလာပြီလို့ ချောက်မြို့နယ်ဆရာဝန်ကြီးက ပြောပါတယ်။
“နေမကောင်းလို့ မိုလာဂိတ်ကိုသွားစစ်လိုက်တာ သုံးယောက်စစ်တာ ကျားနှစ်ဦး ပိုးတွေ့တာ ဘဏ်ဝန်ထမ်းတွေကို မနေ့ကတည်းက Hotel ကွာရန်တင်း သွင်းထားတာ ”လို့ မြို့နယ်ဆရာဝန်ကြီး ဒေါက်တာမျိုးသက်ဦးကပြောပါတယ်။
ဇန်နဝါရီ ၁၈ ရက်ကလည်း CB ဘဏ်ခွဲဝန်ထမ်းက အမျိုးသား တစ်ယောက် ၊ အမျိုးသမီးတစ်ယောက် ပိုးတွေ့ခဲ့ပြီး ကျန်ဝန်ထမ်း ၁၉ ယောက်ကို အဲဒီနေ့ ညနေမှာပဲ ဟိုတယ် ကွာရန်တင်းသွင်းထားခဲ့တာပါ။
ဘဏ်ဝန်ထမ်းတွေအထဲက ကျန်းမာရေးမကောင်းတဲ့ ၃ ယောက်ကို ခေါ်ယူစစ်ဆေးစဉ် အမျိုးသား ၂ ယောက်မှာ ပိုးတွေ့တာဖြစ်ပြီး ၁၆ ယောက်ကို နောက်ရက်မှာ စစ်ဆေး သွားမယ်လို့ မြို့နယ်ဆရာဝန်ကြီးက ပြောပါတယ်။
ချောက်မြို့နယ်မှာ ကိုဗစ်-၁၉ ပိုးတွေ့လူနာပေါင်း ၁၃၁ ယောက် အထိ ရှိနေပြီး Positive Center ပြုလုပ်ထားတဲ့ အမှတ် ၁၀ ရပ်ကွက် မဟာစည်ရိပ်သာမှာ ၂၇ ယောက်သာ စောင့်ရှောက်ထားပြီး ကျန်လူနာတွေကတော့ သက်သာပြောက်ကင်းသွားပြီလို့ သိရပါတယ်။
သတင်း - ကိုလင်း (ချောက်)
