Homeမြန်မာသတင်း
မြန်မာ့ရွေးကောက်ပွဲ လွတ်လပ်၊ တရားမျှတ၊ ငြိမ်းချမ်းစွာ ကျင်းပနိုင်သည့်အပေါ် ကြိုဆိုဂုဏ်ပြုဟု ရုရှားသံရုံးထုတ်ပြန်
မြန်မာ့ရွေးကောက်ပွဲ လွတ်လပ်၊ တရားမျှတ၊ ငြိမ်းချမ်းစွာ ကျင်းပနိုင်သည့်အပေါ် ကြိုဆိုဂုဏ်ပြုဟု ရုရှားသံရုံးထုတ်ပြန်
DVB
·
November 11, 2020
မြန်မာနိုင်ငံမှာ အထွေထွေ ရွေးကောက်ပွဲကို လွတ်လပ်စွာ၊ တရားမျှတစွာ၊ ငြိမ်းချမ်းစွာနဲ့ ကျင်းပနိုင်ခဲ့မှုအပေါ် ဝမ်းမြောက်ဝမ်းသာ ကြိုဆိုဂုဏ်ပြုတဲ့အကြောင်း မြန်မာနိုင်ငံဆိုင်ရာ ရုရှားဖက်ဒရေးရှင်းသံရုံးက ထုတ်ပြန် ကြေညာပါတယ်။
နိုဝင်ဘာ ၈ ရက်နေ့က မြန်မာနိုင်ငံတဝန်း ကျင်းပခဲ့တဲ့ ပါတီစုံဒီမိုကရေစီအထွေထွေရွေးကောက်ပွဲနဲ့ ပတ်သက်ပြီး ရုရှားဖက်ဒရေးရှင်းသံရုံရဲ့ လူမှုကွန်ရက်စာမျက်နှာမှာ နိုဝင်ဘာ ၁၀ ရက်က သတင်းထုတ်ပြန်ထားတာပါ။
အဆိုပါရွေးကောက်ပွဲမှာ မြန်မာတွေ တက်တက်ကြွကြွ ပါဝင်ခြင်းအားဖြင့် ဒီမိုကရေစီနဲ့ နိုင်ငံတိုးတက်မှုအပေါ် သူတို့ရဲ့ ခိုင်မာတဲ့ ကတိကဝတ်တွေကို ထပ်လောင်းအတည်ပြုခဲ့ကြတယ်လို့ ဆိုပါတယ်။
မြန်မာနိုင်ငံဆိုင်ရာ ရုရှားဖက်ဒရေးရှင်းသံရုံးအနေနဲ့လည်း ဖော်ရွေဖွယ် ကောင်းလှတဲ့ မြန်မာပြည်သူပြည်သားတွေနဲ့အတူ မြန်မာနိုင်ငံရဲ့ ဒီမိုကရေစီအသွင်ကူးပြောင်းရေး၊ ငြိမ်းချမ်းရေးနဲ့ သာယာဝပြောရေးအတွက် မြန်မာနိုင်ငံသားတွေနဲ့အတူ ထပ်တူထပ်မျှဝမ်းသာ ဂုဏ်ယူတယ်လို့လည်း ရုရှားသံရုံးထုတ်ပြန်ချက်မှာ ဖော်ပြပါတယ်။
