Homeမြန်မာသတင်း
ကိုဗစ်-၁၉ ကူးစက်ခံရသူထပ်တွေ့သဖြင့် မန္တလေးကုန်စိမ်းတန်း ညစျေးတွင် ဆိုင်ခန်းများထပ်ပိတ်
ကိုဗစ်-၁၉ ကူးစက်ခံရသူထပ်တွေ့သဖြင့် မန္တလေးကုန်စိမ်းတန်း ညစျေးတွင် ဆိုင်ခန်းများထပ်ပိတ်
DVB
·
November 3, 2020
မန္တလေးမြို့၊ မဟာအောင်မြေမြို့နယ်၊ ကမ်းနားလမ်းက ၄၁ လမ်း ကုန်စိမ်းတန်း ညစျေးမှာ ကိုဗစ်-၁၉ ပိုးတွေ့လူနာ ထပ်တိုးလာတာကြောင့် ကုန်စိမ်းရောင်းချတဲ့ ဆိုင်ခန်း ၁၃၁ ခန်းကို နိုဝင်ဘာ ၂ ရက်ကစပြီး ခဏပိတ်ခိုင်းထားတယ်လို့ မန္တလေးမြို့တော် စည်ပင်သာယာရေး ကော်မတီကနေ သိရပါတယ်။
အဆိုပါစျေးမှာ အောက်တိုဘာ ၂၆ ရက်နဲ့ အောက်တိုဘာ ၃၁ ရက်ကစပြီး ကုန်စိမ်းရောင်းချတဲ့ စျေးသည်နှစ်ဦးထံကနေ ကိုဗစ်-၁၉ ပိုးတွေ့ရှိခဲ့တာကြောင့် သူတို့နဲ့ ထိစပ်သူ ၂၅ ဦးကို ကွာရန်တင်းထားရှိပြီး စမ်းသပ်ခဲ့ရာ နိုဝင်ဘာ ၁ ရက် ညပိုင်းက အတည်ပြုလူနာ ၅ ယောက်ထပ်မံ တွေ့ရှိခဲ့တာဖြစ်ပါတယ်။
မန္တလေးစည်ပင်သာယာရေးကော်မတီဝင် ဦးကျော်ဆန်းမြင့်က “တွေ့တာနဲ့ တပြိုင်တည်း ချက်ချင်းပဲ ပိုးဆက်ပြီးမပြန့်ပွားအောင် ဖြတ်တောက်လိုက်တာပေါ့၊ ဒီလိုဟာမျိုးအရင်စျေး ၆ စျေးမှာလည်း လုပ်ဖူးတယ်၊ ကုန်စိမ်းတစ်ယောက်ကို စတွေ့တယ်၊ နောက် ငါးချဉ်တို့ ပုစွန်ချဉ်သည်တို့မှာ ထပ်တွေ့တယ်၊ သူတို့နဲ့ဆက်စပ်တဲ့ ၂၅ ယောက်ကို ကွာရန်တင်း ဝင်ခိုင်းလိုက်ပြီး စစ်လိုက်တဲ့အခါမှာ ၅ ယောက် ထပ်တွေ့တယ်၊ သူတို့နဲ့ထိစပ်ပတ်သက်တဲ့ ၁၃၁ ဆိုင်ကို ခဏ ပိတ်လိုက်တာပါ”လို့ ပြောပါတယ်။
၄၁ လမ်း ကုန်စိမ်းတန်း ညစျေးမှာ ဆိုင်ခန်းပေါင်း ၁၃၀၀ ကျော်ရှိတာဖြစ်ပါတယ်။ တာဝန်ရှိသူတွေအနေနဲ့ ကိုဗစ်-၁၉ ကူးစက်မှုကို ကာကွယ်နိုင်ဖို့ ညွှန်ကြားချက်တွေ၊ စီမံဆောင်ရွက်ပေးမှုတွေ ပြုလုပ်ထားပေမယ့် ဈေးသည်အချို့ကတော့ လိုက်နာမှု အားနည်းနေဆဲ ဖြစ်ပါတယ်။
မန္တလေးမြို့မှာ နိုဝင်ဘာ ၂ ရက်နေ့ ည ၁၀ နာရီအထိ ကိုဗစ်-၁၉ ပိုးတွေ့လူနာပေါင်း ၁,၉၈၉ ယောက်ရှိပြီဖြစ်ပြီး ၉ ယောက်သေဆုံးခဲ့ပြီ ဖြစ်ပါတယ်။
သတင်း - ထိန်ထိန်လင်း
