ကိုဗစ်ကာလ ရှေ့တန်းကတိုက်ပွဲဝင်နေသူများကို ဂရပ်ဖစ်တီရေးဆွဲ အားပေး (ဓာတ်ပုံ)
DVB
·
October 9, 2020
မြန်မာနိုင်ငံမှာ ကိုဗစ်ကာလအတွင်း ရှေ့တန်းက တိုက်ပွဲဝင်နေကြသူတွေ အားတင်းထားဖို့ ရည်ရွယ်ပြီး မန္တလေးမြို့ ၂၂ လမ်း၊ ၈၈ လမ်းနဲ့ ၈၉ လမ်းအနီးရှိ ရုံသာအနောက်ရပ်ကွက်လမ်းကြားမှာ ဂရပ်ဖစ်တီ ရေးဆွဲနေပါတယ်။
အဲဒီ ဂရပ်ဖစ်တီ ရေးဆွဲတာကို အောက်တိုဘာ ၇ ရက်ကစတင်တာလို့ လူငယ် ဂရပ်ဖစ်တီပညာရှင် MC Prince (ကိုသန့်ဇင်ဝင်း) က ပြောပါတယ်။
"ကိုဗစ်ကာလ ရှေ့တန်းက တိုက်ပွဲဝင်ပေးနေတဲ့ ဆရာဝန်တွေ၊ သူနာပြုတွေ၊ ပရဟိတ လူမှုကူညီရေးအဖွဲ့တွေ စတဲ့ သူရဲကောင်းတွေ အားလုံးကို အားတင်းထားဖို့ အားပေးတဲ့အနေနဲ့ သူတို့ ပုံတွေကို ရည်ညွှန်းပုံဖော်ရေးဆွဲထားတာပါ။ သူတို့ပုံဘေးမှာ အမေစုပုံလည်း ထည့်ထားပါတယ်။ သူတို့နဲ့အတူ ဘေးမှာ အမေစုက ကြည့်နေပြီး အားမလျော့ဖို့ အားပေးနေတဲ့ ပုံစံ ရေးဆွဲထားတာပါ။"
အဲဒီ ဂရပ်ဖစ်တီပုံမှာ ဆရာဝန်၊ သူနာပြု၊ ပရဟိတလူမှုကူညီရေးအဖွဲ့တွေ ရဲရဲဝင့်ဝင့် အားအပြည့်နဲ့ ရင်ဆိုင်ဖြတ်ကျော်နေတဲ့ ပုံစံကို ပုံဖော်ရေးဆွဲထားတာဖြစ်ပြီး အောက်တိုဘာ ၈ ရက်မှ အပြီးသတ် ရေးဆွဲခဲ့တာ ဖြစ်ပါတယ်။
သတင်း - သော်တာ
