Homeမြန်မာသတင်း
နိုင်ငံခြားသားများအား မြန်မာပြည်ဝင်ခွင့်ရပ်ဆိုင်းထားမှု အောက်တိုဘာ ၃၁ ရက်အထိ တိုးမြှင့်
နိုင်ငံခြားသားများအား မြန်မာပြည်ဝင်ခွင့်ရပ်ဆိုင်းထားမှု အောက်တိုဘာ ၃၁ ရက်အထိ တိုးမြှင့်
DVB
·
September 29, 2020
မြန်မာနိုင်ငံလာရောက်မယ့် နိုင်ငံခြားသားခရီးသွားတွေပေါ် ပြည်ဝင်ခွင့် ယာယီကန့်သတ်ရပ်ဆိုင်းထားတာကို အောက်တိုဘာ ၃၁ ရက်နေ့အထိ ထပ်မံ တိုးမြှင့်သတ်မှတ်တယ်လို့ နိုင်ငံခြားရေးဝန်ကြီးဌာနက ထုတ်ပြန်ပါတယ်။
ကိုဗစ်-၁၉ ကပ်ရောဂါ ကူးစက်ပြန့်ပွားမှုကို ကာကွယ်ထိန်းချုပ်တဲ့ အစီအမံတွေ ပိုမိုထိရောက်စွာ ဆောင်ရွက်နိုင်ရေး ရှေးရှုပြီး စက်တင်ဘာ ၃၀ ရက်အထိ ထုတ်ပြန်ထားတဲ့ ကန့်သတ်ချက်တွေအားလုံးကို သက်တမ်းထပ်တိုးလိုက်တာလို့ စက်တင်ဘာ ၂၈ ရက် နေ့စွဲနဲ့ ထုတ်ပြန်လိုက်တာပါ။
ကိုဗစ်-၁၉ ကူးစက်ရောဂါ ပြည်ပကနေ ဝင်ရောက်လာနိုင်တာနဲ့ ကူးစက်ပြန့်ပွားတဲ့ အန္တရာယ်ကနေ မြန်မာပြည်သူတွေကို ကာကွယ်စောင့်ရှောက်ပေးနိုင်ဖို့အတွက် ထိရောက်တဲ့ အစီအမံတွေကို ဆက်လက်ချမှတ် ဆောင်ရွက်နိုင်ဖို့အတွက် ထပ်မံတိုးမြှင့် ထုတ်ပြန်လိုက်တာလို့ ဆိုပါတယ်။
သက်တမ်းထပ်တိုးလိုက်တဲ့အထဲမှာ မြန်မာနိုင်ငံကို လာရောက်ကြတဲ့ ခရီးသွားတွေအပေါ် ထပ်တိုးကန့်သတ်ချက်တွေ၊ ဆိုက်ရောက် ဗီဇာနဲ့ အီလက်ထရောနစ်ဗီဇာ ထုတ်ပေးတာတွေကို ယာယီရပ်ဆိုင်းထားတာ၊ မြန်မာနိုင်ငံကို လာရောက်ကြမယ့် နိုင်ငံခြားသားတွေကို ဗီဇာကင်းလွတ်ခွင့်နဲ့ လူမှုရေးဗီဇာ အပါအဝင် ဘယ်ပြည်ဝင်ဗီဇာအမျိုးအစားကိုမဆို ယာယီရပ်ဆိုင်းထားတဲ့ ကြေညာချက်တွေ ပါဝင်ပါတယ်။
ဒါပေမဲ့ အစိုးရတာဝန်နဲ့ဖြစ်စေ၊ မလွှဲမရှောင်သာတဲ့ ကိစ္စတွေကြောင့်ဖြစ်စေ၊ သံတမန်တွေနဲ့ ကုလသမဂ္ဂလက်အောက်ခံအဖွဲ့အစည်းဝင် ဝန်ထမ်းတွေ အပါအဝင် ပြည်ပနိုင်ငံသားတွေအနေနဲ့ မြန်မာနိုင်ငံသို့ ပျံသန်းပြေးဆွဲမယ့် ကယ်ဆယ်ရေးလေယာဉ်တွေ၊ အထူးလေယာဉ်တွေ ရောက်ဖို့ရှိပါက ဗီဇာကင်းလွတ်ခွင့်ရဖို့ သက်ဆိုင်ရာ သံရုံးတွေထံ အကူအညီတောင်းခံနိုင်တယ်လို့ ဆိုပါတယ်။
မြန်မာနိုင်ငံကို လာရောက်မယ့်သူတွေအားလုံးဟာ ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားတဲ့ ကိုဗစ်-၁၉ ရောဂါ ကာကွယ်ထိန်းချုပ်ရေးဆိုင်ရာ ညွှန်ကြားချက်တွေကို မပျက်မကွက်လိုက်နာဖို့ လိုအပ်မှာဖြစ်ပါတယ်။
မြန်မာနိုင်ငံမှာ စက်တင်ဘာ ၂၈ ရက် ည ၈ နာရီအထိ ကိုဗစ်-၁၉ ရောဂါအတည်ပြုလူနာပေါင်း ၁၁,၆၃၁ ယောက်နဲ့ သေဆုံးသူ ၂၅၆ ယောက်ရှိပါတယ်။
