ပြည်တွင် သတင်းသင်တန်းလာပေးသည့် ဆရာအပါအ၀င် ၅ ဦးကို အသွားအလာကန့်သတ်
DVB
·
September 13, 2020
ပဲခူးတိုင်းဒေသကြီး၊ ပြည်မြို့၊ မင်္ဂလာဂါးဒန်းဟိုတယ်မှာ ရွေးကောက်ပွဲဆိုင်ရာသတင်းရေးသားနည်း သင်တန်းလာပေးတဲ့ သင်တန်းဆရာ အပါအ၀င် ၅ ဦးကို ကိုဗစ်-၁၉ အတည်ပြုလူနာနဲ့ ထိတွေ့ခဲ့တာကြောင့် စက်တင်ဘာ ၁၂ ရက်နေ့ကစတင်ကာ အသွားအလာကန့်သတ်စောင့်ကြည့်နေတယ်လို့ သိရပါတယ်။
သင်တန်းကို မီဒီယာကောင်စီနဲ့ လွတ်လပ်သောရွေးကောက်ပွဲများအတွက် အရှကွန်ရက် (ANFREL) အဖွဲ့တို့ ပူးပေါင်းဆောင်ရွက်တာဖြစ်ပါတယ်။
သူတို့ ၅ ဦးဟာ သင်တန်းအတွက် ကားဆရာနဲ့အတူ သင်တန်းအတွက် စက်တင်ဘာလ ၂ ရက်နေ့က စတင်ကာ ပြင်ဦးလွင်ကို ရောက်ရှိခဲ့တာပါ။
ပြည်မြို့ကို ရောက်ချိန်မှာ ကားဆရာမှာ ရောဂါပိုးတွေ့ရှိခဲ့လို့ အသွားအလာ ကန့်သတ်စောင့်ကြည့်ခံနေရတာလို့ သင်တန်းဆရာ ဦးဇေယျာလှိုင်က DVB ကိုပြောပါတယ်။
“ရန်ကုန်ကနေ ၂ ရက်နေ့က ထွက်လာတယ်၊ ပြင်ဦးလွင်ကို ညနေပိုင်း ရောက်တယ်။ သင်တန်း ၃ ရက်လုပ်ပြီးတော့ ၆ ရက်နေ့ ညနေပိုင်းမှာ ပြည်ကို ရောက်တယ်။ အဲဒီအချိန်ထိ ကားဆရာ အမျိုးသမီးမှာ ရောဂါပိုးရှိမှန်း မသိခဲ့ဘူး” လို့ ပြောပါတယ်။
ပြည်မြို့ကို ရောက်ပြီး သင်တန်းရက်တွေဖြစ်တဲ့ ၇ ရက်နေ့ သင်တန်းပေးပြီး ၈ ရက်နေ့ သင်တန်းပို့ချနေချိန်မှာ ကားဆရာရဲ့ အမျိုးသမီးဖြစ်သူမှာ ရောဂါပိုးတွေ့ရှိကြောင်း သတင်းစသိခဲ့ရတာ ဖြစ်ပြီး သင်တန်းကိုတော့ ဆက်မလုပ်ဖြစ်တော့ဘူးလို့ ဆိုပါတယ်။
ကားဆရာရဲ့ အမျိုးသမီးဖြစ်သူ ရောဂါပိုးတွေ့ရှိပြီးနောက်ပိုင်း သင်တန်းဆရာတွေကို လိုက်ပို့တဲ့ ကားမောင်းသူအား ရန်ကုန်ကို ပြန်ပို့ပြီး ဓာတ်ခွဲနမူနာစစ်ဆေးရာမှာ ရောဂါပိုးတွေ့ခဲ့တာလို့ သိရပါတယ်။
သင်တန်းဆရာ အပါ၀င် ၅ ဦးကို ပြည်မြို့က အသွားအလာကန့်သတ်စောင့်ကြည့်တဲ့ သန္တာဆောင်မှာ အသွားအလာကန့်သတ်စောင့်ကြည့်ထားတယ် ကျန်းမာရေးဌာနက သိရပါတယ်။
သင်တန်းဆရာအပါအ၀င် ၅ ဦးရဲ့ နှာခေါင်း၊ အာခေါင်တို့ဖတ် နမူနာတွေကို မနေ့က ညနေပိုင်းမှာ စစ်ဆေးဖို့ ပို့ဆောင်ထားပြီး ၅ ဦးလုံး ကျန်းမာရေးကောင်းမွန်တယ်လို့ သိရပါတယ်။
သင်တန်းလာတက်တဲ့ မကွေး၊ ပဲခူး၊ ဧရာ၀တီ စတဲ့ တိုင်းဒေသကြီးက သင်တန်းသား သင်တန်းသူ သတင်းထောက် ၁၄ ဦးကိုတော့ ဟိုတယ်မှာ ထားရှိကာ အသွားအလာကန့် သတ်စောင့်ကြည့်တာတွေ ပြုလုပ်ထားပါတယ်။
သတင်း၊ ဓာတ်ပုံ - ၀ဏ္ဏထွန်း၊ မင်းထက်မုန်း
