အိုင်စီဂျေတရားရုံးအနေဖြင့် မှန်ကန်သည့် စီရင်ဆုံးဖြတ်ချက်ချမှတ်ရန် မြန်မာတိုက်တွန်း
DVB
·
January 24, 2020
ဂမ်ဘီယာနိုင်ငံက မြန်မာနို်ငငံအပေါ်တရားစွဲထားတဲ့အမှုနဲ့ ပတ်သက်ပြီး အပြည်ပြည်ဆိုင်ရာ တရားရုံး (အိုင်စီဂျေ) အနေနဲ့ အချက်အလက်မှန်တွေကို အခြေခံကာ မှန်ကန်တဲ့ စီရင်ဆုံးဖြတ်ချက် ချမှတ်သွားရေးဟာ မြန်မာနိုင်ငံအတွက် အရေးကြီးတဲ့အကြောင်း မြန်မာနိုင်ငံခြားရေးဌာနက ဇန်နဝါရီ ၂၃ ရက်မှာ ထုတ်ပြန်ကြေညာပါတယ်။
မြန်မာနိုင်ငံမှာလူမျိုးတုံးသတ်ဖြတ်မှုတွေ ရှိနေတယ်ဆိုပြီး ကြားဖြတ် အစီအမံတွေ ချမှတ်ပေးဖို့ ဂမ်ဘီယာနိုင်ငံက လျှောက်ထားချက်အပေါ် အိုင်စီဂျေတရားရုံးက မနေ့က ကြားဖြတ်အစီအမံ ၄ ရပ်ဆောင်ရွက်ဖို့ အမိန့်ချမှတ်လိုက်ပြီးနောက် အမှုကိုဆက်လက် ရင်ဆိုင်ရဖို့ ရှိနေချိန်မှာ မြန်မာနို်ငငံခြားရေးဌာနက ထုတ်ပြန်လိုက်တာပါ။
အပြည်ပြည်ဆိုင်ရာ တရားရုံးက ချမှတ်ခဲ့တဲ့ ဆုံးဖြတ်တွေအပေါ် မြန်မာနိုင်ငံ အစိုးရအနေနဲ့ မှတ်သားထားရှိတဲ့အကြောင်း ဂမ်ဘီယာနိုင်ငံက တရားရုံးကိုတင်ပြတဲ့ စွပ်စွဲချက်တွေနဲ့ပတ်သက်ပြီး တရားသူကြီးတွေအနေနဲ့ မှန်ကန်တဲ့ အချက်အလက်တွေရရှိနိုင်ဖို့ အပြည်ပြည်ဆိုင်ရာတရားရုံး ရှေ့မှောက်မှာ မြန်မာနိုင်ငံက တက်ရောက် ရှင်းလင်းခဲ့ပြီးဖြစ်တယ်လို့ ထုတ်ပြန်ချက်မှာ ဖော်ပြပါတယ်။
အိုင်စီဂျေအနေနဲ့ အမှုကိစ္စကို စတင်ကိုင်တွယ် ဆောင်ရွက်ချိန်မှာ အကာအကွယ်ပေးရေး အစီအမံတွေချမှတ်ဖို့ ပျက်ကွက်ခဲ့တယ်လို့ စွပ်စွဲခံရနိုင်တဲ့ အလားအလာတွေက ကာကွယ်နိုင်ဖို့ ကြားဖြတ်စီမံဆောင်ရွက်ချက်တွေ ချမှတ်ခဲ့လေ့ရှိတဲ့ အစဉ်အလာကို အားလုံးက သိရှိသင့်တယ်လို့ဆိုပါတယ်။
“တရားရုံး၏ ယနေ့ ဆုံးဖြတ်ချက်သည် ယင်းအမှု၏ ဆီလျော်ခိုင်မာမှု (merits) အား တရားရုံးက စီရင်ဆုံးဖြတ်ပိုင်ခွင့် ရှိ-မရှိ အပေါ် တွင်လည်းကောင်း၊ လျှောက်ထားသည့်အမှုကို လက်ခံ ကြားနာခွင့် ရှိ-မရှိနှင့် စပ်လျဉ်း၍ လည်းကောင်း၊ အမှု၏ ဆီလျော်ခိုင်မာမှု (merits) နှင့်ပတ်သက်၍ လည်းကောင်း၊ ကြိုတင်ဆုံးဖြတ်သည့်သဘော လုံးဝ သက်ရောက်စေမည် မဟုတ်ကြောင်း” အပြည်ပြည်ဆိုင်ရာ တရားရုံးက အတည် ပြု ပြောကြားခဲ့တယ်လို့ ထုတ်ပြန်ချက်မှာ ဖော်ပြပါတယ်။
ဒါ့အပြင် မကြာသေးမီက ထုတ်ပြန်ခဲ့တဲ့ လွတ်လပ်သော စုံစမ်းစစ်ဆေးရေး ကော်မရှင် (ICOE)ရဲ့ အစီရင်ခံစာမှာ ကောက်ချက်ချထားသလို ရခိုင်ပြည်နယ်မှာ လူမျိုးပြုန်းတီးစေရန်ကျူးလွန်ခဲ့ခြင်းမရှိကြောင်း၊၊ စစ်ရာဇဝတ်မှု ကျူးလွန်မှုများရှိတာကို ကော်မရှင်က တွေ့ရှိခဲ့ပြီး မြန်မာနိုင်ငံရဲ့ ရာဇဝတ်မှုဆိုင်ရာ တရားစီရင်မှုစနစ်အရ စုံစမ်းစစ်ဆေး အရေးယူနေတယ်လို့ ဆိုပါတယ်။
လူ့အခွင့်အရေးလှုပ်ရှားသူတွေ တင်သွင်းခဲ့ကြတဲ့ အထောက်အထား ခိုင်လုံမှုမရှိသတဲ့ စွပ်စွဲရှုတ်ချမှုတွေကြောင့် ရခိုင်ပြည်နယ်ရဲ့ အခြေအနေကို လိုရာဆွဲ လွဲမှားစွာပုံဖော်လျက်ရှိနေတဲ့အတွက် မြန်မာနိုင်ငံနဲ့ တခြားနိုင်ငံတွေရဲ့ ဆက်ဆံရေး ထိခိုက်စေသလို ရခိုင်ပြည်နယ် ရေရှည်တည်တံ့ခိုင်မြဲတဲ့ ဖွံ့ဖြိုးတိုးတက်ရေးအတွက် အခြေခံကောင်းတွေချမှတ်ဖို့ မြန်မာနိုင်ငံရဲ့ ကြိုးပမ်းဆောင်ရွက်နေမှုတွေအပေါ် အဟန့်အတား ဖြစ်စေခဲ့တယ်လို့ နိုင်ငံခြားရေးဝန်ကြီးဌာန ထုတ်ပြန်ချက်မှာ ဖော်ပြထားပါတယ်။
