ရယ်မောထိတ်လန့်ကြောက်ရွံ့စရာ “ကြောက် ကြောက် ကြောက် (၂)” ရုပ်ရှင်(နမူနာ)
DVB
·
December 24, 2019
ရယ်မောပျော်ရွှင်စရာတွေရော ထိတ်လန့်ကြောက်ရွံ့စရာတွေကိုပါ တပြိုင်တည်း ခံစားကြရမယ့် ထူးခြားတဲ့ မြန်မာရုပ်ရှင်ကား ကြောက်ကြောက်ကြောက် (၂) ကို လာမယ့် ဒီဇင်ဘာလ ၂၆ ရက်နေ့မှာ ရုံတင်ပြသတော့မှာ ဖြစ်ပါတယ်။
ဒီရုပ်ရှင်ကားကိုတော့ 7th Sense ရုပ်ရှင်ထုတ်လုပ်ရေးက တင်ဆက်လိုက်တာ ဖြစ်ပြီး ငြိမ်းချမ်းကျော်ရဲ့ ဇာတ်လမ်းကို နေစိုးသော်နဲ့ လွင်မင်းအံ့တို့က ဇာတ်ညွှန်းခွဲထား ပေးခဲ့တာ ဖြစ်ပါတယ်။ ဒီကားကို ရိုက်ကူးပုံဖော်ထားသူကတော့ မုန်းစွဲရုပ်ရှင်နဲ့ ပရိသတ်တွေ အသိအမှတ်ပြုခဲ့ကြရတဲ့ ဒါရိုက်တာ ဩရသပဲ ဖြစ်ပါတယ်။
ဒီရုပ်ရှင်ကတော့ ပြီးခဲ့တဲ့ ၂၀၁၇ ခုနှစ်တုန်းက ထွက်ရှိခဲ့ပြီး ရုံတင်ပြသခဲ့တဲ့ ကြောက်ကြောက်ကြောက်ရုပ်ရှင်ရဲ့ နောက်ဆက်တွဲရုပ်ရှင်အနေနဲ့ ထွက်ရှိလာခဲ့တာပါ။
ဒီကားထဲမှာတော့ သရုပ်ဆောင်မင်းသား နေတိုး၊ ထွန်းထွန်း၊ တိုင်ရွန်၊ နန်းဆုဦး၊ မေမြင့်မိုရ်တို့နဲ့အတူ ကလေးသရုပ်ဆောင် ပြည့်ပြည့်နဲ့ တခြားသရုပ်ဆောင်တွေလည်း အများကြီး ပါဝင်ထားကြတာပါ။
ဒီရုပ်ရှင်ကတော့ အကြောင်းအရာကိုယ်စီနဲ့ ခရီးထွက်လာကြပြီး တိုက်တိုက်ဆိုင်ဆိုင်ပဲ ထူးဆန်းတဲ့ကားတစ်စီးပေါ်မှာ အားလုံးအတူစီးမိကြတဲ့အခါမှာတော့ ဘာတွေ ဆက်ဖြစ်လာမလဲ၊ ဘယ်လိုသွေးပျက်ထိတ်လန့်စရာ အခြေအနေတွေနဲ့ ရင်ဆိုင်ကြရမလဲ ဆိုတာတွေကို ရင်တထိတ်ထိတ်နဲ့ ရှုစားကြရမှာ ဖြစ်ပါတယ်။
လတ်တလောမှာတော့ ဒီရုပ်ရှင်ကား Trailer ဟာ ဖေ့စ်ဘွတ်ခ်ပေါ်မှာတော့ ဝင်ရောက်ကြည့်ရှု ကြတဲ့ အကြိမ်ရေ ၆ သန်းနီးပါး ရှိနေခဲ့ပြီ ဖြစ်ပါတယ်။
