ဟင်းထဲကို ဆားထုပ်နှင့်မှားပြီးထည့်စားမိရာက မိသားစုဝင် ၅ ဦး အစာအဆိပ်သင့်
DVB
·
December 3, 2019
မန္တလေးတိုင်းဒေသကြီး၊ ဝမ်းတွင်းမြို့နယ်၊ သဲတောမြို့၊ ကျော်ဇောလှိုင်ရပ်ကွက်မှာ နေထိုင်တဲ့ မိသားစုဝင် ၅ ဦး အစာအဆိပ်သင့်လို့ မန္တလေးပြည်သူ့ဆေးရုံကို ပို့ဆောင်ထားလိုက်ရပါတယ်။
သဲတော(၃)ရပ်ကွက်နေ ဦးသန်းငွေ (၆၀နှစ်) ဇနီး ဒေါ်ခင်အေးကြည်တို့မိသားစု ၅ဦးဟာ ဒီဇင်ဘာ ၁ ရက်နေ့က ခရမ်းချဉ်ဟင်းထဲကို ဆားထုပ်နဲ့မှားပြီး ထည့်စားမိရာက အစာအဆိပ်သင့်ခဲ့ ကြတာလို့ သဲတော(၃)ရပ်ကွက် အုပ်ချုပ်ရေးမှူး ဦးမြင့်ဦးက ပြောပါတယ်။
"အမျိုးသား ၂ဦးနဲ့ အမျိုးသမီး ၃ ဦး ပေါင်း ၅ ဦးဖြစ်သွားတယ်။ မန္တလေးဆေးရုံ ပို့လိုက်ရ တယ်။ ပံ့သကူပစ်တုန်းက ကောက်ထားတဲ့ အထုပ်ကို ဆားထုပ်ထင်ပြီး ဟင်းထဲထည့်စားမိတာက အော့အန်ကုန်တယ် အစာအဆိပ် ဖြစ်သွားတာပေါ့"လို့ အုပ်ချုပ်ရေးမှူးက ဒီဗွီဘီကို ပြောပါတယ်။
အစာအဆိပ်သင့်တဲ့ မိသားစုကို ဝမ်းတွင်းမြို့သန္တိသုခလူမှူကူညီရေးအသင်းကားနဲ့ အခြားပရဟိတကားတွေအသုံးပြုပြီး ဝမ်းတွင်းဆေးရုံမှ မန္တလေးဆေးရုံကို ပြောင်းရွေ့ ပို့ဆောင် ဆေးကုသမှုပေးထားပြီး အခုအချိန်မှာတော့ မိသားစု ၅ ဦးစလုံး သက်သာစပြုလာပြီလို့ အိမ်နီးချင်းတွေက ပြောပါတယ်။
ဆားထုပ်နဲ့မှားပြီး စားသုံးမိခဲ့တဲ့ အထုပ်ဟာ ချည်ဆေးဆိုးရာမှာ အသုံးပြုတဲ့ ဓာတ်ဆားလို့ ထင်မြင်ယူဆတဲ့ အကြောင်းနဲ့ ဓာတ်ခွဲကြည့်ဖို့အတွက် ဓာတုဗေဒရုံးကို ပို့ထားတယ် လို့ ဝမ်းတွင်းဆေးရုံတာဝန်ကျဝန်ထမ်းက ပြောပါတယ်။
သတင်း-မောင်မောင်လင်း
