ရန်ကုန်တိုင်း၊ တိုက်ကြီးမြို့နယ်၊ အိုင်ကလောင်အကျဉ်းစခန်းကနေ နိုဝင်ဘာလ ၁၉ ရက် ညနေ ၃ နာရီလောက် ထွက်ပြေးလာတဲ့ အကျဉ်းသား ၂ ယောက်ကို ရေတွင်းဖြူ ကျေးရွာအုပ်စု ကပ်ကတော့ကျေးရွာက ရွာသားတွေက ဝိုင်းဝန်းဖမ်းဆီးခဲ့ပြီး နီးစပ်ရာ ဖိုးခေါင်နယ်မြေ ရဲစခန်းကို ပြန်အပ်ခဲ့တယ်လို့ ကျေးရွာသားတွေက ပြောပါတယ်။
ထွက်ပြေးလာတဲ့ အကျဉ်းသား ၂ ဦးက မနေ့ညနေပိုင်းက ကပ်ကတော့ကျေးရွာအရောက် ရွာလမ်းမပေါ်မှာ ရပ်ထားတဲ့ ဆိုင်ကယ်ကိုမောင်းနှင်ထွက်ပြေးရာမှ ကျေးရွာသားတွေက လိုက်လံဖမ်းဆီးခဲ့တာပါ။
ဖိုးခေါင်နယ်မြေ ရဲစခန်းစခန်းမှူး ရဲအုပ်ဌေးလွင်က "ထွက်ပြေးတဲ့နှစ်ယောက်မှာ ခိုင်ကိုဆိုတဲ့တယောက်က မုဒိန်းမှုနဲ့ထောင် ၁၀ နှစ်ကျခံနေတဲ့သူဖြစ်ပြီး၊ သူရစိုးကခိုးမှုနဲ့ ထောင် ၃ နှစ်ကျခံနေတဲ့သူ နှစ်ယောက်ဖြစ်တယ်။ အုပ်ချုပ်ရေးမှူးနဲ့အဖွဲ့တွေက အကြောင်းကြားလို့ သွားဖမ်းဆီးခဲ့ပြီး အိုင်ကလောင်အကျဉ်းစခန်းကို တခါထဲလွှဲပေးခဲ့တယ်လို့"ပြောပါတယ်။
အိုင်ကလောင်အကျဉ်းစခန်းမှာ ၂၀၁၉ ခုနှစ်က အကျဉ်းသားထွက်ပြေးမှု သုံးကြိမ်ဖြစ်ပွားခဲ့ပြီး ပြန်လည်ဖမ်းဆီးမိတာတွေရှိသလို ထွက်ပြေးလွတ်မြောက်နေတဲ့ သူတွေလည်း ရှိပါတယ်။
သတင်း - မေသွယ်
