တောင်ကြီး တန်ဆောင်တိုင် ရိုးရာမီးပုံပျံပွဲတော် စတင်ကျင်းပ
DVB
·
November 5, 2019
ရှမ်းပြည်နယ်၊ တောင်ကြီး တန်ဆောင်တိုင်ရိုးရာ မီးပုံးပျံပွဲတော်ဖွင့်ပွဲကို နိုဝင်ဘာ ၄ ရက်ညက စိန်နားပန်မီးပုံးပျံ နှစ်လုံးနဲ့ မီးပုံးပျံအလုံးငယ် ၄၈၀၀ ကျော် တပြိုင်နက်လွှတ်တင်ပြီး ဖွင့်လှစ်ခဲ့ပါတယ်။
ဖွင့်ပွဲအခမ်းအနားကို တိုင်းရင်းသားယဉ်ကျေးမှု ရိုးရာအကတွေ၊ ရှမ်းရိုးရာ ကိန္နရီ ကိန္နရာအကနဲ့ ဒေါင်းအကတို့နဲ့ ဖျော်ဖြေတင်ဆက်ပြီး မီးရှူး၊ မီးပန်း ပစ်ဖောက်ခဲ့ကြပါတယ်။
တောင်ကြီးတန်ဆောင်တိုင် ရိုးရာ မီးပုံးပျံ ဖွင့်ပွဲ အခမ်းအနားကို ရှမ်းပြည်နယ်ဝန်ကြီးချုပ် ဒေါက်တာလင်းထွဋ်နဲ့ အစိုးရအဖွဲ့ဝင် ဝန်ကြီးတွေ တိုင်းရင်းသားရေးရာ ဝန်ကြီးတွေ ကိုယ်ပိုင်အုပ်ချုပ်ခွင့်ရ ဒေသဦးစီးအဖွဲ့တွေ တက်ရောက်ဖွင့်လှစ်ပေးခဲ့ပါတယ်။
တောင်ကြီး တန်ဆောင်တိုင် ပထမဆုံး ညမှာ ညမီးကြီးမီးပုံးပျံ ၇ လုံး၊ စိန်နားပန် ၃ လုံး လွှတ်တင်ရာမှာ စိန်နားပန်တလုံး ခေါင်ပွင့်ပျက်ကျပြီး ရာသီဥတုကြောင့် ညမီးကြီး နှစ်လုံးလွှတ်တင်နိုင်ခြင်း မရှိပါဘူး။
မနေ့ညက မလွှတ်တင်နိုင်တဲ့မီးပုံးပျံကို ဒုတိယ နေ့မှာပေါင်းပြီး ပြန်လည်လွှတ်တင် သွားမှာဖြစ်ပါတယ်။
တောင်ကြီးတန်ဆောင်တိုင် ရိုးရာမီးပုံးပျံပွဲတော်ကို နိုဝင်ဘာ ၄ ရက်မှ နိုဝင်ဘာ ၁၂ ရက်အထိ ကျင်းပနေတာ ဖြစ်ပါတယ်။
အခုနှစ်တောင်ကြီးတန်ဆောင်တိုင်ရိုးရာ မီးပုံးပျံပြိုင်ပွဲမှာ ညမီးကြီး အမျိုးအစား မီးပုံးပျံ ၇၉ လုံး၊ စိန်နားပန် မီးပုံးပျံ ၃၆ လုံး၊ ခြေနှစ်ချောင်း နေ့လွှတ်အရုပ် ၁၅၀ လုံး၊ ခြေ ၄ ချောင်း နေ့လွှတ် အရုပ် ၉၄ လုံး၊ အုပ်စု အရုပ် ၃၅ လုံး စုစုပေါင်း မီးပုံးပျံအလုံးရေ ၃၉၄ လုံးဝင်ရောက်ယှဉ်ပြိုင်သွားမှာဖြစ်ပါတယ်။
သတင်း- ခွန်ရာဇာ
