မိတ္ထီလာတွင် တပ်ကြပ်ကြီး ၁ ဦးအား ဓားဖြင့်ခုတ်ပြီး လုယက်မှုဖြစ်ပွား
DVB
·
October 7, 2019
မန္တလေးတိုင်းဒေသကြီး၊ မိတ္ထီလာမြို့နယ်၊ ထနောင်းကန်ရွာလမ်းခွဲအနီးမှာ အောက်တိုဘာလ ၆ ရက် ညနေက အဝေးသင်တက္ကသိုလ် တက်နေတဲ့ အမှတ် (၁၀) တပ်မတော်အကြီးစား စက်ရုံက တပ်ကြပ်ကြီး ၂ ဦး ဓားနဲ့ခုတ်ပြီး လုယက်ခံလိုက်ရတယ် လို့ မိတ္ထီလာအမှတ်-၃ ရဲစခန်းက ပြောပါတယ်။
မိတ္ထီလာ အမှတ် (၃) ရဲစခန်းတာဝန်ကျ ရဲအရာရှိက "တပ်ကြပ်ကြီး ၁ ဦးပဲ ဒဏ်ရာရတယ်။ ညာဘက်လက်ကောက်ဝတ် ပြတ်ရှဒဏ်ရာ ၂ချက် နဲ့ ညာဘက်လက်ဖဝါးမှာ ၄လက်မလောက် ပြတ်ရှဒဏ်ရာ ရသွားတယ်။ ခုတင် ၅၀၀ တပ်မတော်ဆေးရုံ ပို့ပေးရတယ် မစိုးရိမ်ရပါဘူး။ တရားခံတွေ အမြန်ဆုံး ဖမ်းမိအောင် လုပ်ဆောင်နေပါတယ်" လို့ ပြောပါတယ်။
ပထဝီဘာသာအဓိကနဲ့ အဝေးသင်တက္ကသိုလ် တတိယနှစ်ကို တက်ရောက်နေတဲ့ အမှတ် (၁၀) တပ်မတော်အကြီးစားစက်ရုံမှ တပ်ကြပ်ကြီးပိုင်စိုးသူနဲ့ တပ်ကြပ်ကြီးသက်ဝေတို့ ၂ ဦး အဝေးသင်တက္ကသိုလ်မှ ဆိုင်ကယ်နဲ့ တပ်ကို ပြန်လာကြစဉ် ထနောင်းကန်ရွာလမ်းခွဲအနီးမှာ အမည်မသိ အမျိုးသား ၄ ဦး စီးလာတဲ့ ဆိုင်ကယ်က ကျော်တက်ပြီး ကန့်လန့်ပိတ်ရပ်ခဲ့ပါတယ်။
ဒိနောက် အဆိုပါ အမျိုးသားက အရိုးသွား ၁၀လက်မရှိပြီး ဗြက် ၄ လက်မ ရှိတဲ့ မီးဖိုချောင်သုံး စတီးဓားနဲ့ တပ်ကြပ်ကြီးသက်ဝေကို ခုတ်တာကြောင့် ဒဏ်ရာရခဲ့ပါတယ်။ တပ်ကြပ်ကြီးပိုင်စိုးသူကတော့ ရှောင်တိမ်းလိုက်တာကြောင့် ဒဏ်ရာမရခဲ့ပါဘူး။
အဲဒီနောက် Mi Note7 ဖုန်း ၁ လုံး နဲ့ ငွေ ကျပ် ၁၂၀၀၀ ပါ ပိုက်ဆံအိတ်ကို ယူပြီး ထွက်သွားကြတယ်လို့ ရဲစခန်းမှာ တိုင်ချက်ပေး အမှုဖွင့်ထားပါတယ်။
မိတ္ထီလာ အမှတ် (၃) ရဲစခန်းက အမည်မသိ အမျိုးသား ၄ ဦးကို ဒဏ်ရာရအောင်ပြုလုပ်ပြီး လုယက်မှုရာဇသတ်ကြီးပုဒ်မ ၃၉၄၊ အားပေးကူညီမှု ရာဇသတ်ကြီးပုဒ်မ ၁၁၄ တို့နဲ့ အမှုဖွင့်ထားပါတယ်။
သတင်း-မောင်မောင်လင်း
