ရန်ကုန်-မန္တလေးလမ်းဟောင်းတွင် မြင်းလှည်းအား ၆ ဘီးကား ဝင်တိုက်၊ ၁ ဦးသေဆုံး
DVB
·
June 30, 2019
ရန်ကုန်-မန္တလေးလမ်းဟောင်း မိုင်တိုင် ၃၈၀/၃ နှင့် ၄ အကြား ဝမ်းတွင်းမြို့နယ် ကိုင်းရွာအနီး ကိုင်းတံတားပေါ်မှာ ဇွန်လ ၂၈ ရက် ညနေက မြင်းလှည်းတစီးကို ၆ ဘီးကား ဝင်တိုက်တာကြောင့် အသက် ၇၀ အရွယ် အဖိုး ၁ ဦး သေဆုံးကာ ၃ ဦး ဒဏ်ရာရခဲ့တယ်လို့ ရွှေတောင်ရွာရဲစခန်းက ပြောပါတယ်။
ရွှေတောင်ရွာရဲစခန်း တာဝန်ကျရဲအရာရှိက "အဖိုး ၁ ဦး နေမကောင်းလို့ ကူမဲမြို့က ဆေးခန်းသွားပြတာပါ။ ၆ ဘီးကားက ဘရိတ်ပေါက်ပြီး ဝင်တိုက်တယ်။ အဖိုး ၁ ဦးကတော့ ကျောက်ဆည်ဆေးရုံပို့နေတုန်း လမ်းမှာပဲသေဆုံးသွားတယ်။ ကျန် ၃ ဦးကတော့ ဒဏ်ရာရ သွားတယ်။ ဝမ်းတွင်းဆေးရုံနဲ့ ကျောက်ဆည်ဆေးရုံ တွေမှာ ဆေးကုနေတယ်။ မစိုးရိမ်ရပါဘူး" လို့ ပြောပါတယ်။
သေဆုံးသွားသူကတော့ အသက် ၇၀ အရွယ် အဖိုး ဦးအောင်သန်းဖြစ်တယ်လို့ သိရပါတယ်။
ဒေသခံကိုကျော်စိန်က "မြင်းလှည်းပေါ်မှာ အသက် ၇၀ အဖိုး အဖွား ၄ ဦးပါတယ်။ နောက်ကနေ ဝက်တိုက်တာ မြင်းလှည်းကတော့ မှောက်သွားတယ်။ အဖိုးအဖွားတွေချည်း ဖြစ်သွားတာ စိတ်မကောင်းစရာပါ"လို့ ပြောပါတယ်။
ရွှေတောင်ရွာရဲစခန်းမှာ ၆ ဘီးကား ယာဉ်မောင်း ဇော်မင်းနောင်ကို ယာဉ်မဆင်မခြင် မောင်းလို့ လူသေဆုံးမှု၊ သာမန်ဒဏ်ရာရမှု၊ ပြင်းထန်ဒဏ်ရာရမှု ရာဇသတ်ကြီး ပုဒ်မ ၃၀၄-က/၃၃၇/၃၃၈ တို့နဲ့ အမှုဖွင့်ထားပါတယ်။
သတင်း-မောင်မောင်လင်း
