စစ်ပြေးဒုက္ခသည် ၁၀၀ ကျော် စစ်တွေမြို့ပေါ်သို့ ထွက်ပြေးခိုလှုံ
DVB
·
May 12, 2019
ရခိုင်ပြည်နယ်အတွင်း ဖြစ်ပွားနေတဲ့ တပ်မတော်နဲ့ အေအေ တိုက်ပွဲတွေကြောင့် ရသေ့တောင်မြို့နယ်နဲ့ ဘူးသီးတောင်မြို့နယ်မှ ရွာသား ၁၀၀ ကျော်လောက်ဟာ မေ ၉ ရက်နေ့ကစတင်ပြီး စစ်တွေမြို့ ကယုချောင်းကျောင်းတိုက်နဲ့ အမျိုးသားကျောင်းတိုက်ကို ခိုလှုံရောက်ရှိလာကြပါတယ်။
နယ်မြို့နယ်တွေမှာ လုံခြုံမှုမရှိသလို အလုပ်အကိုင်တွေလည်း မရှိတော့တဲ့အတွက် စားဝတ်နေရေး အလွန်အခက်တွေ့နေကြပြီး နောက်ထပ်လည်း စစ်တွေမြို့ကို ထွက်ပြေး လာကြ မယ့်သူတွေ ရှိနေကြောင်း၊ လမ်းစရိတ်မတတ်နိုင်တဲ့အတွက် မလာရောက်နိုင်သူတွေ ကျန်နေသေးကြောင်း စစ်ဘေးရှောင်တွေက ပြောပါတယ်။
"ဒေသအတွင်း တိုက်ပွဲတွေ ဆက်ဖြစ်နေတယ်။ တပ်တော်က ရွာတွေကို ဖမ်းဆီး စစ်ဆေးနေတာတွေ ရှိနေတယ်။ ဒါကြောင့် စိုးရိမ်ကြောက်လန့် ထွက်ပြေးလာရတာ ဖြစ်တယ်။ ရသေ့တောင် ကျောက်တန်းကျေးရွာမှာ ရွာသူ/သားတွေကို မသွားရ မလာရ ဖမ်းဆီး စစ်ဆေးနေတယ်။ ကျနော်တို့ ရွာမှာလည်း ဒီလိုတွေဖြစ်လာမှာ လူတွေက စိုးရိမ်နေကြတယ်။ ဒါကြောင့် မနေရဲလို့ ကျနော်တို့လည်း ပြေးလာခဲ့ကြတာပါ။ နောက်လည်း ထွက်ပြေးလာကြမယ့် ရွာသူ/သားတွေများစွာ ရှိနေပါသေးတယ်။ ခရီးစရိတ်မရှိလို့ မလာနိုင်သူတွေလည်း ရှိပါတယ်လို့" ရသေ့တောင်မြို့နယ် စစ်ဘေးရှောင် ကိုသိန်းဟန်ကပြောပါတယ်။
စစ်တွေမြို့ကို ထွက်ပြေးလာတဲ့ ဒုက္ခသည်တွေမှာ ရသေ့တောင်မြို့နယ်မှ ရေပုတ်၊ သောင်းဒြား၊ ရေခေါင်းချောင်း၊ အောင်သာစည်၊ ခရုချောင်းကျေးရွာသားတွေနဲ့ ဘူးသီးတောင် မြို့နယ်မှ သပြေဆိပ်၊ စည်တောင်၊ သိုင်းတပုတ် ကျေးရွာသားတွေဖြစ်ပြီး ထိုအထဲမှာ ကိုယ်ဝန်ဆောင်အမျိုးသမီးတွေလည်း ပါရှိနေကြောင်းသိရပါတယ်။
စစ်တွေမြို့ကို ထွက်ပြေးလာကြတဲ့ စစ်ဘေးရှောင်ဒုက္ခသည်တွေကို ရခိုင်ပြည်နယ် ၀န်ကြီးချုပ် ဦးညီပု ပြည်နယ်လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ဖုန်းတင့်နဲ့ တာဝန်ရှိသူတွေက သွားရောက်တွေ့ဆုံ အားပေးစကား ပြောကြားပြီး ထောက်ပံ့ငွေနဲ့ ထောက်ပံ့ပစ္စည်းတွေ ပေးအပ်ကြပါတယ်။
စစ်ရှောင်မိသားစုဝင်တွေကို လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာနမှ ဆန်ရိက္ခာတလစာအတွက် တဦးကို ၉၀၀၀ နှုန်းနဲ့ ထောက်ပံ့ငွေ ၉ သိန်းကျပ် ကျားလုံချည်၊ မလုံချည်၊ တံဘက်နဲ့ တီရှပ်တို့ကို ထောက်ပံ့ပေးအပ်ခဲ့တယ်လို့ သိရပါတယ်။
စစ်တွေမြို့တွေကို ထွက်ပြေးလာကြတဲ့ စစ်ဘေးရှောင်များမှာ စစ်တွေမြို့လမ်းမတော် တောင်ရပ်ကွက်ရှိ အမျိုးသားကျောင်းတိုက်မှာ ၆၉ ဦးနဲ့ ကယုချောင်းကျောင်းတိုက်မှာ ၃၁ ဦးတို့ စစ်ဘေးခိုလှုံနေ ကြောင်း သိရပါတယ်။
ဗညား
