မြိတ်ကျွန်းစု အပန်းဖြေခရီးသွား အပျော်စီးသင်္ဘော တိမ်းမှောက် ၂ ဦးသေဆုံး
DVB
·
December 24, 2018
တနင်္သာရီတိုင်းဒေသကြီး၊ မြိတ်ကျွန်းစုကို အပန်းဖြေခရီးသွားတဲ့ အပျော်စီးသင်္ဘော တိမ်းမှောက်ပြီး ခရီးသည် အမျိုးသမီး ၂ ဦး သေဆုံးသွားပါတယ်။
ထူးထက်ရှိန် ခရီးသွားကုမ္ပဏီက ပို့ဆောင်တဲ့ အပျော်စီးသင်္ဘောဟာ ဒီဇင်ဘာ ၂၃ ရက် မွန်းလွဲပိုင်းက မြိတ်ကျွန်းစုရှိ ရေပြည့်အော်ကျေးရွာအရှေ့ ရေပြင်မှာ ပင်လယ်ထဲမျောနေတဲ့ သစ်တုံးကို အရှိန်နဲ့တိုက်မိပြီး တိမ်းမှောက်ခဲ့တာပါ။
ရေယာဉ်ပေါ်မှာ ခရီးသည် ၁၇ ဦးနဲ့ လှေသား ၂ ဦး လိုက်ပါလာသွားရာမှာ ခရီးသည် ၂ ဦး သေဆုံးပြီး ၁ ဦး ဒဏ်ရာရရှိခဲ့တယ်လို့ မြိတ်မြို့မရဲစခန်း တာဝန်ရှိသူက ပြောပါတယ်။
သေဆုံးသွားသူ ၂ ဦးဟာ မန္တလေးမြို့မှာနေထိုင်တဲ့ ဒေါ်ကျင်စိန်နဲ့ ရန်ကုန်မြို့မှာနေတဲ့ ဒေါ်ခင်ဆောင်းတင့်တို့ဖြစ်ပြီး သေဆုံးသူတွေကို မြိတ်မြို့ပြည်သူ့ဆေးရုံကြီးကို ပို့ဆောင်ထားပါတယ်။
ခရီးသွားကုမ္ပဏီ တာဝန်ရှိသူတွေကို ဆက်သွယ်စုံစမ်းပေမယ့် ဆက်သွယ်လို့ ရသေးပါဘူး။
သတင်း၊ ဓာတ်ပုံ - အောင်ကျော်
