ဝမ်းသာတာပဲ သိတယ် - ကျပ်သိန်း ၁ သောင်းထီဆုရှင်
နော်နိုရင်း
·
November 2, 2018
နိုဝင်ဘာလ ၁ ရက်က ဖွင့်လှစ်တဲ့ အကြိမ် ၂၀ မြောက် အောင်ဘာလေထီဖွင့်ပွဲမှာ ကျပ်သိန်းတသောင်းဆုကို ပဲခူးမြို့က စက်ဘီးပြင်တဲ့ အဘိုးအဘွား ဇနီးမောင်နှံက ဆွတ်ခူးရရှိ သွားပါတယ်။
အဘိုးအို ဦးစိန်ထွန်းနဲ့ အဘွားအို ဒေါ်ဒေါင်းတို့ဟာ ပဲခူးမြို့သစ် (င) ရပ်ကွက် မြို့ပတ်တာလမ်းမှာ နေထိုင်ကာ စက်ဘီးပြုပြင်ရေးနဲ့ အသက်မွေးဝမ်းကျောင်းနေသူတွေဖြစ်ပြီး မိဘမဲ့ကလေးငယ် ၂ ဦးကို စောင့်ရှောက်ပေးနေသူဖြစ်ပါတယ်။
အခုလို သိန်းတသောင်းဆု ဆွတ်ခူးရရှိတဲ့အပေါ် ဒေါ်ဒေါင်းက “၀မ်းသာတာပဲ သိပါတယ်ရှင့်။ အဒေါ်က လင်မယားနှစ်ယောက်ရယ် ဖအေ၊ မအေ မရှိတဲ့ မြေးလေး ၂ ယောက်ကို ကျောင်းထားရတယ်။ အဖေအမေမရှိတဲ့ ကျောင်းသားလေး အခု ၉ တန်း၊ အခု သမီးအငယ်က မွေးထားတဲ့ ၁၀ တန်းကျောင်းသူလေး တယောက် အဲဒါတွေအတွက်ကို ရည်ရွယ်တဲ့ စိတ်ကူးချက်တွေ၊ ရည်ရွယ်ချက်ကလေးတွေ အောင်မြင်သွားတာပေါ့။”
ဆွတ်ခူးရရှိတဲ့ ထီဆုကို ထုတ်ဖို့ အခု ရန်ကုန်ငွေထုတ်တဲ့ ရုံးမှာ ရောက်နေပြီး ထုတ်နိုင်ရေး လုပ်ငန်းစဉ်တွေ ဆောင်ရွက်နေတယ်လို့ ဒေါ်ဒေါင်းက ပြောပါတယ်။
ဒေါ်ဒေါင်းအနေနဲ့ အရင်ကလည်း ဦးနေ၀င်းရဲ့ မဆလအစိုးရလက်ထက် ၂ ကျပ်တန် ထီခေတ်တုန်းကလည်း ကျပ် ၅ သောင်းဆု ဆွတ်ခူးရရှိခဲ့ဖူးပါတယ်။
“ထီတစောင် ၂ ကျပ်နဲ့တုန်းကတော့ ၅ သောင်းဆုပေါက်ဖူးပါတယ်။ ဒါပေမယ့် သူများလိမ်သွားတယ်လေ။ ပေါက်တဲ့ ခုနှစ်တော့ မမှတ်မိတော့ဘူး။ ကျမတို့ ထုတ်ပြီးတော့မှ ရောင်းတဲ့ထီသည်က ပိုက်ဆံကိုယ့်ကို လာပေးပြီးမှ ကိုယ်က သူများကိုသွားအပ်ထားတာ။ နောက်ကျတော့ အဲဒီကောင်လေးက ကားတိုက်ပြီးတော့ သေသွားတယ်လေ။ အဲဒါနဲ့ ပိုက်ဆံ မရလိုက်ဘူး။ ”
ထီတစောင် ၂ ကျပ်တန်ခေတ်တုန်းကတော့ ပထမဆု ကျပ် ၁ သိန်း ရရှိတာ ဖြစ်ပါတယ်။
ဓာတ်ပုံ- Kyaw Myo Oo
