ဧရာဝတီတိုင်းတွင် သစ္စာအထူးစီမံကိန်းဖြင့် မှတ်ပုံတင်ပြုလုပ်ပေးနေ
DVB
·
November 2, 2018
ဧရာဝတီတိုင်းဒေသကြီးထဲမှာ သစ္စာအထူးစီမံကိန်းနဲ့ လူဝင်မှုကြီးကြပ်ရေးဌာနကနေ အသက် ၁၀ နှစ်နဲ့ အသက် ၁၈ နှစ်ပြည့်ပြီးသူတိုင်းကို နေ့ချင်းပြီး မှတ်ပုံတင်ပြုလုပ်ပေးနေပါတယ်။
လက်ရှိမှာတော့ အင်္ဂပူမြို့နယ်ထဲရှိ ကျေးရွာအုပ်စု ၇၂ ခုနဲ့ ရပ်ကွက် ၈ ခုရှိ ပြည်သူတွေကို နိုင်ငံသားစိစစ်ရေး ကတ်ပြားတွေရရှိအောင် ကွင်းဆင်းဆောင်ရွက်နေပါတယ်။
၁၉၈၂ ခုနှစ် မြန်မာနိုင်ငံသား ဥပဒေနဲ့အညီ ဆောင်ရွက်ပေးနေတာဖြစ်ပြီး အသက် ၁၀ နှစ်ပြည့်သူတွေကို ပုံစံ ၄ (က)၊ အသက် ၁၈ နှစ်ပြည့်သူတွေကိုတော့ ပုံစံ ၆ (က) နဲ့ မှတ်ပုံတင်ရရှိအောင် ဆောင်ရွက်ပေးနေတယ်လို့ အင်္ဂပူမြို့နယ် လူဝင်မှုကြီးကြပ်ရေးဦးစီးဌာန ဦးစီးမှူး စိုင်းလှသိန်းဦးက ပြောပါတယ်။
"ကျနော်တို့ ဌာနကနေ နိုင်ငံတော်အတိုင်ပင်ခံနဲ့ သမ္မတရဲ့လမ်းညွှန်မှုနဲ့ ဧရာဝတီတိုင်းအတွင်း မှတ်ပုံတင်မရှိတဲ့သူ မရှိရလေအောင် ခုလိုသစ္စာ အထူးစံမံကိန်းနဲ့ ကွင်းဆင်း ဆောင်ရွက်ပေးနေတာ။”
ကျွဲသောင်းကျေးရွာ အုပ်ချုပ်ရေးမှူး ဦးသန်းထွဋ်ကတော့ "ခုလိုကွင်းဆင်းပြီး မှတ်ပုံတင်ရရှိဖို့ ကျနော်တို့က အုပ်စုတွင်းမှာ စာရင်းအရင်ကောက်တယ်။ ပြီးတော့ ကျောင်းတွေက ဆရာဆရာမတွေနဲ့ ညှိနှိုင်းပြီး အချက်အလက်တွေကို လဝကဦးစီးဌာနကို တင်ပြပြီး ကွင်းဆင်း ဆောက်ရွက်ဖို့ စီစဉ်ရပါတယ်”လို့ ပြောပါတယ်။
နတ်ခြံအုပ်စုနေ ကိုကုလားကြီးကတော့ "ခုလိုကွင်းဆင်းဆောင်ရွက်တော့ ကျနော်တို့ တောသူတောင်သားတွေအတွက် အဆင်ပြေတာပေါ့။ မြို့နယ်သွားလုပ်ရင် ဆိုင်ကယ်ကယ်ရီခ ထမင်းစတဲ့ ကုန်ကျစားရိတ်များတယ်လေ။ အောက်ခြေကွင်းဆင်းလုပ်ပေးတော့ အဆင်အရမ်းပြေပါတယ်။ ဖြစ်နိုင်ရင် သုံးလ တကြိမ်လောက် ဆင်းလုပ်ပေးစေချင်တယ်"လို့ ပြောပါတယ်။
ပြီးခဲ့တဲ့ အောက်တိုဘာလထဲမှာ အင်္ဂပူမြို့နယ်အတွင်းရှိ အသက် ၁၀ နှစ်နဲ့ ၁၈ နှစ်ပြည့်ပြီးသူ ၁၂၆၄ ဦးကို မှတ်ပုံတင်ထုတ်ပေးနိုင်ခဲ့ပြီး မှတ်ပုံတင်မရရှိသူတွေကိုလည်း စီမံကိန်းချ ဆောင်ရွက်ပေးနေပါတယ်။
သတင်း-ဓာတ်ပုံ- သန်းထိုက်မြင့်
