“ငယ်ငယ်က စာသင်ခန်းထဲမှာ ကျမရဲ့ရင်သားကို ဆရာတယောက်က မထိတထိနဲ့ကိုင်တာ ခံရဖူးတယ်။  ဆရာ ဆိုတော့ ပြန်မပြောရဲဘူး။ ကြောက်ခဲ့တယ်” မန္တလေးမြို့က ဒေါ်စန္ဒာက အတိတ်ကအကြောင်းတွေကို  ပြန်ပြောပြနေတာပါ။ အခုချိန်မှာ အသက် (၄၀) အရွယ်ကို ရောက်နေပြီဖြစ်တဲ့ ဒေါ်စန္ဒာဟာ အဲဒီအချိန်တုန်းက ဆယ်ကျော်သက်အရွယ် (၆) တန်း ကျောင်းသူလေးတယောက်ဖြစ်ပြီး အဆောင်မှာ စာသင်ကြားပေးတဲ့ဆရာက မိမိရဲ့ ခန္ဓာကိုယ်အား ကိုင်တွယ်ခဲ့တာကို ပြန်ပြောနေခြင်းဖြစ်ပါတယ်။ “အဲဒီတုန်းက ရှက်လည်းရှက်တယ်။ ဘယ်သူ့ကိုမှ မပြောပြရဲဘူး။ ဆရာကိုလည်း ကြောက်ရတယ်” လို့ ဒေါ်စန္ဒာက သူခံစားခဲ့ရတာကို ပြန်ပြောပြပါတယ်။ မိဘတွေကလည်း သားသမီးစကားကို မယုံကြည်လို့ အဆောင်မှာ ဖြစ်ပျက်တဲ့ကိစ္စကို ပြန်ပြောပြတဲ့အခါမှာ အဆောင်မှာ မနေချင်လို့ပြောနေတာလို့ ထင်ခဲ့တယ်လို့ သူက ဆက်ပြောပါတယ်။ မိန်းကလေးတယောက်ရဲ့ ခန္ဓာကိုယ်ကို အမျိုးသားတယောက်က ကိုင်တွယ်တာဟာ ပြစ်မှုမြောက်ပြီး တိုင်ကြားနိုင်တယ်ဆိုတာကို သူတို့ဆယ်ကျော်သက်အရွယ်မှာ သေချာမသိရှိခဲ့ကြပါဘူး။ လက်ရှိမှာ ဆယ်ကျော်သက်တွေ အများဆုံးနေထိုင်ကြတဲ့ ပုဂ္ဂလိကအဆောင်တွေမှာ  ဆရာတွေက မိန်းကလေးငယ်တွေကို ထိကပါးရိကပါးလုပ်တာ၊ ခန္ဓာကိုယ်ကို ထိတွေ့ကိုင်တွယ်တာတွေ ဖြစ်နေတယ်လို့ မုံရွာမြို့  Justice House ရဲ့ ပြောရေးဆိုခွင့်ရှိသူ ကိုကျော်သူရိန်ထွန်းက ပြောပြပါတယ်။ “ကျနော်တို့ ပုဂ္ဂလိကအဆောင်တွေမှာ အမျိုးသမီးအခွင့်အရေးတွေ၊ ကလေးအခွင့်အရေးတွေ သွားဟောပြောရင် အများဆုံး ကြုံရကြားရတာကတော့ မိန်းကလေးငယ်တွေရဲ့ ခန္ဓာကိုယ်ဖြစ်တဲ့ တင်တွေ၊ ရင်တွေကို ဆရာတွေက ကိုင်တွယ်တယ်လို့ ကလေးတွေက ပြောပြပါတယ်” လို့  သူက ပြောပါတယ်။ ဆယ်ကျော်သက်အရွယ်နဲ့ သက်ဆိုင်တဲ့ ဥပဒေတွေ၊ ဆယ်ကျော်သက် မိန်းကလေးတွေအနေနဲ့ မိမိခန္ဓာကိုယ်ကို ကိုင်တွယ်ထိပါးလာရင် ငြိမ်မနေဘဲ တိုင်ကြားရမယ်ဆိုတာကို ဦးစားပေးဟောပြောနေရတယ်လို့လည်း ကိုကျော် သူရိန်ထွန်းက ပြောပါတယ်။ “ကျမငယ်ငယ်တုန်းက မိန်းကလေးဖြစ်လို့ အိမ်ထဲကနေ အိမ်ပြင်မထွက်ရဘူး။ လူကြီးတွေ မပါရင် အပြင်ပေးမထွက်ဘူး။ ယောက်ျားလေးတွေ စတာနောက်တာ၊ မတော်တရော်တွေ လုပ်ပြတာမျိုးရှိရင်လည်း ကိုယ်အနေအထိုင်မတတ်လို့ဆိုပြီး အရိုက်ခံရတယ်” လို့ (၁၈) နှစ်အရွယ် ပထမနှစ် ဓာတုဗေဒတက်နေတဲ့ မကျူးလစ်က အတိတ်က အဖြစ်အပျက်ကို ပြောပါတယ်။ လမ်းမှာ ယောက်ျားလေးတွေရဲ့ စနောက်တာ ခံရလို့ အိမ်ကိုပြန်တိုင်တဲ့အခါ မိန်းကလေးတွေ အသုံးမကျလို့ အနေအထိုင်မတတ်လို့ အခုလိုလုပ်တာခံရတာလို့ တထစ်ချစွပ်စွဲပြောဆိုတာ ခံရတယ်လို့လည်း မကျူးလစ်က ပြောပါတယ်။ “အရင်ကဆို လူကြားထဲ မတိုးရဲဘူး။ ပတ်ဝန်းကျင် စနောက်ရင်လည်း ဒီအတိုင်း ငြိမ်ခံတယ်။ ပြန်မပြောရဲဘူး” လို့ မကျူးလစ်က  ပြောပြပါတယ်။ မကျူးလစ်ဟာ ဆယ်ကျော်သက်နဲ့ သက်ဆိုင်တဲ့ လူ့အခွင့်အရေး၊ အမျိုးသမီးအခွင့်အရေးသင်တန်းတွေကို တက်ရောက်ခဲ့ပြီး နောက်ပိုင်းမှာတော့ ပြောင်းလဲလာခဲ့ပါတယ်။ “သင်တန်းတွေတက်ပြီးတော့ ကိုယ့်ကို မဟုတ်တာတွေ စနောက်လာရင် ကိုယ်ဘယ်လိုပြန်ပြီး တုံ့ပြန်လို့ရမလဲဆိုတာ သိလာတယ်။ အမှားအမှန်လည်း ခွဲခြားတတ်လာတယ်။ တခုခုဖြစ်ရင် ရှက်စရာမဟုတ်ဘူး၊ ပြန်ပြောရမယ်ဆိုတာတွေ သိလာပါတယ်” လို့လည်း သူမက ပြောပြပါတယ်။ စူးစမ်းမှုရှိပြီး စမ်းသပ်ချင်တဲ့အရွယ်ဖြစ်တဲ့ ဆယ်ကျော်သက်မိန်းကလေးတွေအတွက် လူ့အခွင့်အရေး အသိပညာပေးမှုတွေ အားနည်းနေဆဲဖြစ်တယ်လို့ အမျိုးသမီးအရေး ဆောင်ရွက်နေသူတွေက ပြောဆိုလိုက်ပါတယ်။ ဆယ်ကျော်သက်အရွယ်ဆိုတာ ထိလွယ်ရှလွယ်တဲ့ အရွယ်တွေဖြစ်သလို  ဆယ်ကျော်သက် အရွယ်တွေကို ပစ်မှတ်ထားပြီး စော်ကားဖို့၊ ကျူးလွန်ဖို့  အခွင့်ကောင်းယူချင်သူတွေလည်း မနည်းလှပါဘူး။ ဒါကြောင့် ဆယ်ကျော်သက် မိန်းကလေးတွေဟာ သူတို့အရွယ်မှာ ရင်ဆိုင်ရတဲ့ မတရားမှုတွေ၊ လိင်ပိုင်းဆိုင်ရာ ထိပါးမှု၊ ချိုးဖောက်မှုတွေကို ဘယ်လိုကာကွယ်သင့်သလဲ၊ ဘယ်လိုတုံ့ပြန်ရမလဲဆိုတာ သိလို့လိုအပ်ပါတယ်။ အမျိုးသမီးတွေဟာ ငယ်စဉ်ကလေးဘဝကတည်းက မိသားစုအသိုင်းအဝန်းထဲမှာလည်း ခွဲခြားဆက်ဆံခံရသလို လူ့အခွင့်အရေးချိုးဖောက်မှုတွေလည်း မသိမသာပြုကျင့်ခံနေကြရတယ်လို့ ဆယ်ကျော်သက်ရွယ် အမျိုးသမီးတွေကို သင်တန်းပေးနေတဲ့ မြန်မာ့အမျိုးသမီးသမဂ္ဂ (BWU) မှ ဇူးပဒုမ္ပာက ပြောပြပါတယ်။ ဖွံ့ဖြိုးမှုနည်းတဲ့ဒေသတွေမှာ ဆယ်ကျော်သက်မိန်းကလေးတွေရဲ့ဘဝက အဖက်ဖက်မှာ ပညာပေးဖို့ လိုအပ်နေပြီး ဆယ်ကျော်သက်အရွယ် ကျန်းမာရေး၊ အမျိုးသမီးအခွင့်အရေး၊ လူ့အခွင့်အရေးတွေကို ပိုပြီးတော့ အသိပေးဖို့လို အပ်တယ်လို့  စွမ်းရည်မြှင့်တင်ရေးတာဝန်ခံ ဇူးပဒုမ္ပာက ပြောလိုက်တာပါ။ “ဆယ်ကျော်သက်အရွယ်ကတော့ အရှက်တရားတွေကြီးတယ်။ ပြောရဲဆိုရဲမရှိကြဘူး။ မိသားစုထဲမှာလည်း နေရာမပေးမှုတွေ၊ သမီးမိန်းကလေးမို့ အခွင့်အရေးမပေးမှုတွေကြောင့် အလိုလိုနေရင်း ကြောက်စိတ်တွေများနေတာ တွေ့ရတယ်” လို့  ဇူးပဒုမ္ပာက ဆိုပါတယ်။ ဆယ်ကျော်သက်ရွယ် အမျိုးသမီးတွေဟာ အနာဂတ်ရဲ့လူငယ်တွေဖြစ်လာမှာမို့ အခုအချိန်ကစပြီး အခြေခံလူ့အခွင့်အရေးနဲ့ အခြားအခွင့်အရေးပိုင်းဆိုင်ရာတွေ သိနားလည်ထားသင့်တယ်လို့ သူမက ဆက်လက်ပြောပါတယ်။ အမျိုးသမီးနဲ့ ကလေးသူငယ်တွေကို လူ့အခွင့်အရေးဆိုင်ရာ သင်တန်းပေးနေတဲ့ Justice House (တရားဥပဒေ စိုးမိုးရေးနဲ့ တရားမျှတမှုစီမံချက်) မှ  ကိုကျော်သူရိန်ထွန်းက “နယ်တွေမှာ အမျိုးသမီးတွေရော၊ ကလေးသူငယ်တွေပါ သူတို့နဲ့ဆိုင်တဲ့ ဥပဒေတွေကို မသိကြဘူး။ မိန်းကလေးတယောက်ကို ယောက်ျားလေးတယောက်က နှုတ်နဲ့ ကျူးလွန်တာ  ပြစ်မှုမြောက်တယ်ဆိုတာ သူတို့မသိကြဘူး။ စတာနောက်တာလို့ ယူဆကြတယ်” လို့ ပြောပါတယ်။ “အမျိုးသမီးနဲ့ ကလေးသူငယ် အခွင့်အရေးတွေက မသိတဲ့သူအများကြီးရှိသေးတယ်။ ဒါကြောင့် ပိုပြီးလုပ်ပေးသင့်တယ်” လို့လည်း ကိုကျော်သူရိန်ထွန်းက ဆိုပါတယ်။ စာသင်ကျောင်းတွေမှာ ကလေးသူငယ်အခွင့်အရေး သွားရောက်ဟောပြောမှုတွေ ပြုလုပ်တဲ့အခါမှာ ကလေးတွေက ဆရာတွေ ရှိနေရင် စကားသိပ်မပြောကြဘူးလို့လည်း သူက ဆက်လက်ပြောပြပါတယ်။ အမျိုးသမီးအခွင့်အရေးနဲ့ လူ့အခွင့်အရေး သင်ရိုးညွှန်းတမ်း လူ့အခွင့်အရေးဆိုတဲ့ စကားလုံးကို ကျောင်းသင်ရိုးညွှန်းတမ်းမှာ ထည့်သွင်းသင်ကြားပေးဖို့ လူမှုအဖွဲ့အစည်းတွေ၊ လူ့အခွင့်အရေး တက်ကြွလှုပ်ရှားသူတွေက တောင်းဆိုထားပေမယ့် လက်ရှိအချိန်ထိတော့ ထည့်သွင်းခြင်း မရှိသေးပါဘူး။ ကျောင်းပညာရေးသင်ရိုးညွန်းတမ်းတွေမှာ လူ့အခွင့်အရေးဆိုင်ရာ အကြောင်းအရာတွေအပြင် ဆယ်ကျော်သက်ရွယ် အမျိုးသမီးနဲ့ ကျန်းမာရေးဆိုင်ရာ ပညာပေးမှုတွေကိုလည်း အသက်အရွယ်အပိုင်းအခြားအလိုက်  ထည့်ပေးသင့်တယ်လို့ လူ့အခွင့်အရေးတက်ကြွလှုပ်ရှားသူတွေက ပြောဆိုကြပါတယ်။ “အသက် (၁၁) နှစ်အရွယ်ကစ လူ့အခွင့်အရေးခေါင်းစဉ်ကြီးနဲ့ မဟုတ်ရင်တောင်မှ လူ့အခွင့်အရေး ဝေါဟာရတွေ လူအချင်းချင်း အပြန်အလှန် လေးစားမှုရှိစေတဲ့၊ လူသားချင်း ခွဲခြားဆက်ဆံမှု မပြုစေတဲ့၊ ဘာသာရေးအပေါ် အခြေခံပြီး မခွဲခြားသင့်တာတွေ ထည့်သွင်းသင်ကြားပေးသင့်ပါတယ်” လို့ ဇူးပဒုမ္ပာက ဆိုပါတယ်။ ဆက်လက်ပြီး ကိုကျော်သူရိန်ထွန်းကလည်း “သင်ရိုးညွှန်းတမ်းမှာထည့်ပြီး သင်ကြားရင် အသက်အရွယ် အပိုင်းအခြားအလိုက် ခွဲခြားဆက်ဆံမှုတွေ လျော့နည်းလာမယ်။ အချင်းချင်းကြားမှာ ပိုသင့်မြတ်လာပြီး အပြန်အလှန် လေးစားတတ်လာမယ်လို့ ထင်ပါတယ်” လို့  ဆိုပါတယ်။ လူ့အခွင့်အရေးဆိုတာ ဆယ်ကျော်သက်အမျိုးသမီးတွေတင် နားလည်ဖို့မဟုတ်ဘဲ မြန်မာပြည်မှာ ဆယ်ကျော်သက် အမျိုးသားရော အမျိုးသမီးပါ လူ့အခွင့်အရေးကို စသင်လို့ ရတဲ့အရွယ် သင်ပေးဖို့လိုပြီး ဒီအရွယ်တွေကို သင်ကြားပေးတာက ပိုပြီးထိရောက်တယ်လို့ လူ့အခွင့်အရေးပညာပေးမှုတွေပြုလုပ်နေတဲ့  ညီမျှခြင်း(မြန်မာ) မှ စီမံကိန်းတာဝန်ခံ ကိုနေလင်းထိုက်ကလည်း ပြောပါတယ်။ မြန်မာနိုင်ငံမှာတော့ ဆယ်ကျော်သက်အရွယ် မိန်းကလေးတွေသာမက အရွယ်ရောက်အမျိုးသမီးတွေပါ ကိုယ့်အခွင့်အရေး ချိုးဖောက်ခံရတာတွေကို မပြောရဲကြဘဲ ကျူးလွန်ခံရသူကိုသာ အပြစ်မြင်တတ်တဲ့ လူမှုအသိုင်းအဝန်းတခုလုံးကိုလည်း ပညာပေးမှုတွေ အများကြီးပြုလုပ်ရပါဦးမယ်လို့ ကိုနေလင်းထိုက်က ဆက်လက်ပြောဆို လိုက်ပါတယ်။ အမျိုးသမီးတွေအပေါ် လူ့အခွင့်အရေးချိုးဖောက်တာ သိရရင် ဒါတွေကို ထိရောက်တဲ့ ကာကွယ်ပေးမှုတွေရှိဖို့ ယန္တရားတွေလည်း အရေးကြီးပါတယ်လို့ လူ့အခွင့်အရေး ဆောင်ရွက်သူနေတွေက ဝေဖန်ထောက်ပြလိုက်ပါတယ်။ ငယ်ရွယ်တဲ့ အမျိုးသမီးတွေအပေါ် လိင်ပိုင်းဆိုင်ရာ အကြမ်းဖက်မှုတွေများနေတဲ့အတွက် အဲဒီလိုလိင်ပိုင်းဆိုင်ရာ အကြမ်းဖက်မှုတွေ၊ ထိကပါးရိကပါး လုပ်မှုတွေ ကြုံတွေ့လာရင် ဘယ်လိုတားဆီးကာကွယ်ရမလဲဆိုတဲ့ အသိပညာပေးမှုတွေနဲ့ အထောက်အကူပြုအစီအစဉ်တွေ စနစ်တကျ လုပ်ဆောင်ထားပေးသင့်ပါတယ်လို့ ဆယ်ကျော်သက် အမျိုးသမီး မကျူးလစ်ကလည်း ဆက်လက်ပြောဆိုပါတယ်။ “ကျမငယ်ငယ်တုန်းက ကြုံတွေခဲ့ရတာကို ဒီခေတ်ကလေးတွေ ဆက်မဖြစ်စေချင်တော့ဘူး။  ဖြစ်လာရင် ဘယ်လို ကာကွယ်ရမယ်၊ ဘယ်လိုတိုင်ကြားလို့ ရတယ်ဆိုတာ သိထားဖို့လိုအပ်တယ်။ နောက်မိဘတွေကလည်း ကလေးတွေပြောတာကို သေချာဂရုစိုက်နားထောင်ပေးဖို့၊ အလေးထားဖို့ တောင်းဆိုချင်တယ်” လို့ ဒေါ်စန္ဒာကလည်း ပြောလိုက်ပါတယ်။ ဆယ်ကျော်သက်ရွယ် လူ့အခွင့်အရေးပညာပေးမှုတွေဟာ မိန်းကလေးတွေအတွက်သာမက ယောက်ျားလေးငယ်တွေအတွက်ပါ လိုအပ်နေတာပါ။ ဆယ်ကျော်သက်အရွယ် ယောက်ျားလေးတွေအပေါ်မှာလည်း လိင်ပိုင်းဆိုင်ရာ ထိပါးချိုးဖောက်မှုတွေဖြစ်နေတာကို ဒီနောက်ပိုင်းကာလတွေမှာ ဆရာတွေရဲ့ ကျူးလွန်မှု၊ အလုပ်ရှင်တွေရဲ့ ကျူးလွန်မှု၊ ဘာသာရေးဆိုင်ရာပုဂ္ဂိုလ်တွေရဲ့ ကျူးလွန်မှုတွေအဖြစ် ကြားသိ တွေ့မြင်လာကြရပြီလို့ လူ့အခွင့်အရေးပညာပေးတဲ့အလုပ်တွေ လုပ်ဆောင်နေတဲ့ သင်တန်းဆရာ/မတွေကလည်း အခိုင်အမာပြောကြားလာကြတာ ဖြစ်ပါတယ်။ (ယခုဆောင်းပါးကို http://hiburma.net/ ဝက်ဘ်ဆိုက်မှ ကူးယူဖော်ပြပါသည်။)