သာသနာမြေတိုးချဲ့ရန် မြေယာသိမ်းဆည်းမှု ဒုသမ္မတထံ တိုင်ကြား
DVB
·
May 12, 2018
ဘားအံမြို့နယ်၊ ရဲသာကျေးရွာအုပ်စု၊ ကျောက်ကလပ်ရွာမှာ သာသနာမြေတိုးချဲ့ဖို့ဆိုပြီး ဒေသခံတွေရဲ့ နေအိမ်၊ ဥယျာဉ်ခြံမြေ၊ လယ်တွေကို အတင်းအဓမ္မ သိမ်းဆည်းခဲ့တဲ့ ဘုရားဂေါပ က အဖွဲ့နဲ့ တာဝန်ရှိသူတွေကို ဒုသမ္မတ ဟင်နရီဗန်တီးယူထံ မေ ၁၀ ရက်နေ့က တင်ပြတိုင်ကြားထားတယ်လို့ နစ်နာတဲ့ဒေသခံတွေက ပြောပါတယ်။
လူနေအိမ်၊ လယ်၊ ဥယျာဉ်ခြံမြေတွေကို ကျောက်ကလပ်စေတီ သာသနာနယ်မြေတိုးချဲ့ဖို့ အတင်းအဓမ္မသိမ်းဆည်းပြီး စက်ယန္တရားကြီးတွေနဲ့ ၀င်ရောက်ဖျက်ဆီးနေတာကို တားမြစ်ခဲ့တဲ့ ဒေသခံတွေအား ဂေါပကအဖွဲ့က ပြန်လည်တရားစွဲဆိုခဲ့တယ်လို့ ဆိုပါတယ်။
ဘားအံမြို့နယ်၊ ကော့မရမ်းရွာ၊ ဦးချစ်ကိုကိုက “လက်ရှိ လယ်လည်း အသိမ်းခံရတယ်။ ခြံမြေလည်း အသိမ်းခံရတယ်။ သာသနာမြေအကုန်လုံး အဖြိုဖျက်ခံရတယ်ဆိုတော့ ဥပဒေမဲ့လွန်းရာကျပါတယ်။ ဒီအဖြစ်ကို သေချာစိစစ်ပြီးတော့ တကယ်ခံစားနေရတဲ့ ကျနော်တို့အတွက် ကူညီပေးပါလို့ တောင်းဆိုရင်း တင်ပြပါတယ်” လို့ ပြောပါတယ်။
ရဲသာကျေးရွာအုပ်စု၊ ကျောက်ကလပ်ရွာ ဒေါ်ပြူးရှည်က “အဘွားတို့ လယ်မြေတွေကို လာသိမ်းလိုက်လို့ရှိရင် ကိုယ့်က ဘယ်မှာသွားနေတော့မလဲ။ ဘာတွေလုပ်စားရမလဲ။ ဒီမှာလည်း အပင်တွေ ဘာတွေစိုက်စားလာတာ ကြာပြီ။ သစ်သီးဝလံလည်း သီးနေပြီ။ စိတ်မကောင်းဖြစ်တာပေါ့။ စားဝတ်နေရေး လုပ်စားလို့ မတတ်တော့ဘူးပေါ့။ ဒါကြောင့်မို့ စိတ် ဆင်းရဲရတယ်”လို့ ပြောပါတယ်။
ဘားအံမြို့နယ်၊ ရဲသာကျေးရွာအုပ်စု၊ ကျောက်ကလပ်ရွာ ဒေါ်ချစ်သွင်က “လယ် သိမ်းစကနေ အခုထိ သူတို့ ဘာမှညှိနှိုင်းတာ မရှိဘူး။ ကျမတို့ကို ၂၀၀၀ ခုနှစ်မှာ ဂေါပကတွေ မောင်းထုတ်တယ်။ ဒီကေဘီအေခေတ်ဆိုတော့ ကျမတို့ ဘာမှမပြောရဲဘူး။ ခြိမ်းခြောက်တယ်လေ။ သေနတ်နဲ့ ပစ်ဖောက်တယ်ဆိုတော့ ဘာမှမပြောရဲဘူး။ ဒီမှာရှိတဲ့ အိမ်နေရာအကုန်လုံး မောင်းထုတ်တယ်။ ကျမတို့ ဘယ်လို ပြောင်းရမလဲ။ ကျမတို့ ဇာတိမြေ ဒီမှာပဲနေတာပဲဟာ။ ကျမတို့ မပြောင်းနိုင်ဘူး”လို့ ပြောပါတယ်။
ဘားအံမြို့နယ်၊ လှိုင်ရွာ ဦးစိန်လင်းက “၂၀၀၉ ခုနှစ်မှာ ကျနော် ပြန်လာနေတော့ စခန်းမှူး နဲ့တိုင်တော့ ကျနော့်ကို လာဖမ်းတယ်။ ဓမ္မာရုံအတွင်းမှာပဲ ကျနော် ရိုက်ပုတ်ခံရတယ်။ အချက်ပေါင်း ၂၀ ကျော်တောင်မှ အရိုက်အပုတ်ခံရတယ်။ သူတို့မောင်းထုတ်ပေမယ့် မပြောင်းဘူး၊ မထွက်ဘူး။ ဘာလို့ မထွက်လည်းဆိုတော့ ကျနော်ခြံမြေက ပြေစာရှိလို့ မ ထွက်တာ။ အခု ကျနော်တို့ကို တရားစွဲတယ်။ ကျနော်ခြံ ကျနော်ပိုင်ထားတဲ့ ပြေစာ လက်ရှိ ရှိတယ်ဆိုတော့ ရင်ဆိုင်ရဲပါတယ်” လို့ ပြောပါတယ်။
၁၉၇၆ ခုနှစ်ထဲက နောင်ခရိုင်တောင်ကွင်း၊ ကွင်းအမှတ် (၁၁ ၈၈/ခ)၊ ဦးပိုင်အမှတ် (၁၇၁၊၁၆၇၊ ၁၄၃၊ ၁၅၄၊ ၁၄၅၊ ၁၄၆၊ ၁၄ ၈၊ ၁၄၉၊ ၁၄၄၊ ၁၆၁၊ ၁၄၄၊ ၁၆၃၊ ၁၇၀၊ ၁၂၈၊ ၁၃၁၊ ၁၃၀၊ ၁၂၉ ၊ ၁၃၂၊ ၁၅၁၊ ၁၂၅) တွေမှာ အိမ်ခြံမြေ အမျိုးအစား G3 အဖြစ် နဲ့ ကျေးရွာက တရားဝင်အိမ်ခြံမြေ ကွက်ရိုက် ချထားပေးခဲ့တာပါ။
သာသနာတိုးချဲ့မြေအဖြစ် ဒေသခံ ၂၅ ဦးရဲ့ ဥယျာဉ်ခြံမြေ ၆၃ ဧက၊ လယ်မြေဧက ၃၀ ကျော်ကို သိမ်းဆည်းခံခဲ့ရတယ်လို့ ဒေသခံတွေက ပြောပါတယ်။
ပထမအကြိမ် ဒေသခံတွေက လယ်ယာမြေနှင့် အခြားမြေများ သိမ်းဆည်းခံရမှုများ ပြန်လည်စိစစ်ရေး ဗဟိုကော်မတီကို တင်ပြတိုင်ကြားခဲ့လို့ ၂.၂.၂၀၁၇ ရက်နေ့က စာအမှတ် ၁၉၄/၁-ကော်မတီ/မြေ(ဗဟို)/၂၀၁၇ နဲ့ ပြည်နယ်အဆင့်ကို စိစစ်ဆောင်ရွက်ဖို့နဲ့ ဆောင်ရွက်ပြီးစီးမှုကို ပြန်လည်တင်ပြဖို့ ညွှန်ကြားခဲ့ပေမယ့် နစ်နာတဲ့ ဒေသခံတွေကို ယနေ့တိုင် ခေါ်ယူစိစစ်ပြီး ဆောင်ရွက်ပေးတာမရှိဘူးလို့ ပြောပါတယ်။
လယ်ယာမြေနှင့် အခြားမြေများသိမ်းဆည်းခံရမှုများ ပြန်လည်စိစစ်ရေးကော်မတီနဲ့ သက်ဆိုင်ရာတာဝန်ရှိသူတွေထံ သွားရောက်တွေ့ဆုံမေးမြန်းဖို့ ကြိုးစားပေမယ့် တွေ့ဆုံခွင့် မပေးခဲ့ပါဘူး။
သတင်းနှင့်ဓာတ်ပုံ - ရဲမင်းခေါင်
