တပ်မတော်အရာရှိ ဟန်ဆောင် လက်နက်ကိုင်သူအား ဖမ်းဆီးအရေးယူ
DVB
·
April 2, 2018
မန္တလေးတိုင်းဒေသကြီး ပြင်ဦးလွင်မြို့နယ်၊ ရေငယ်ကျေးရွာ မန္တလေး-လားရှိုး ကားလမ်းဘေးရှိ ရွှေမူဆယ်စားသောက်ဆိုင်မှာ တပ်မတော်အရာရှိဝတ်စုံ (ကော်လာတံဆိပ်မပါ) စစ်ယူနီဖောင်း ဝတ်ဆင်ထားတဲ့ လက်နက်ကိုင်ဆောင်ထားသူ တဦးကို ဖမ်းဆီး အရေးယူထားတယ်လို့ ရဲတပ်ဖွဲ့က သတင်းထုတ်ပါတယ်။
မတ် ၂၇ ရက် မွန်းလွဲပိုင်းက မူဆယ်မြို့၊ ဘိုဖိုင်ကျေးရွာနေ ညွန့်စိန် (၅၈-နှစ်)နဲ့ ပြင်ဦးလွင်မြို့နယ်၊ ရပ်ကွက်ကြီး-၇ နေ စံသီး (ခ) စံသေး (၄၄-နှစ်)တို့ကို MDY 3K/2653 Wish ယာဉ်နဲ့အတူ မင်္သကာဖွယ်ရာ တွေ့ရှိခဲ့လို့ ရဲက စစ်ဆေးမေးမြန်းခဲ့ပါတယ်။
စစ်ဆေးမေးမြန်းရာမှာ တပ်မတော်အရာရှိ ဟန်ဆောင်ထားတဲ့ ညွန့်စိန်ရဲ့ လက်ကိုင်အိတ်အတွင်းမှ ၉ မမ ပစ္စတို ၁ လက်၊ ၉ မမကျည် ၇ တောင့် နဲ့ ၈ တောင့်၊ ဖြည့်ထားတဲ့ ကျည်အိမ် ၂ ခု၊ ၉ မမကျည်အလွတ် ၁၇ တောင့်၊ စုစုပေါင်း ၉ မမ ကျည် ၃၂ တောင့်ကို တရားမဝင် ကိုင်ဆောင်ထားကြောင်း၊ ညွန့်စိန်က စံသီးကို ကား ၁ စီး ငှားပေးဖို့ အကူအညီတောင်းခံခဲ့လို့ Wish ယာဉ်အား ငှားရမ်းပေးခဲ့ကြောင်း တွေ့ရှိရတယ်လို့ဆိုပါတယ်။
ဒါ့အပြင် ညွန့်စိန်ဟာ ပြင်ဦးလွင်မြို့နယ်အတွင်း စိုက်ပျိုးရေးလုပ်ငန်းလုပ်ဖို့ မြေဝယ်ယူရာမှာ ပြည်သူ့စစ်ဆိုပြီး စစ်ဝတ်စုံအား ဝတ်ဆင်ခဲ့တာ ဖြစ်တယ်လို့ ရဲသတင်းမှာ ဖော်ပြပါတယ်။
ကိုင်ဆောင်ထားတဲ့ သေနတ်ဟာ ၂၀၁၆ ခုနှစ်က တရုတ်နိုင်ငံ၊ ကျယ်ဂေါင်မြို့က တရုတ်နိုင်ငံသား ၁ ဦးဆီကနေ တရုတ်ငွေ ၃၅၀၀၀ ယွမ်နဲ့ ဝယ်ယူကိုင်ဆောင်ခဲ့တာ ဖြစ်ကြောင်း၊ ညွန့်စိန်နဲ့ စံသီး(ခ)စံသေး တို့ကို ပိတ်ချင်းမြောင် ရဲကင်းစခန်းက လက်နက်အက်ဥပဒေပုဒ်မ ၁၉(စ)၊ ရာဇသတ်ကြီးပုဒ်မ ၁၄၀/၁၁၄ တို့နဲ့ အမှုဖွင့်ထားတယ်လို့ သိရပါတယ်။
ဓာတ်ပုံ-ရဲဇာနည်
