ဒလမြို့နယ်တွင် ၁၀၀၀၀ နှင့် ၅၀၀၀ တန် ငွေစက္ကူအတုများ သိမ်းဆည်းရမိ
DVB
·
March 11, 2018
ဒလမြို့နယ်မှာ ၁၀,၀၀၀ နဲ့ ၅,၀၀၀ ကျပ်တန် ငွေစက္ကူတွေ သိမ်းဆည်းရမိခဲ့တယ်လို့ ပြည်ထဲရေးက သတင်းထုတ်ပြန်ပါတယ်။
မတ်လ ၉ ရက်နေ့က ဒလမြို့နယ်၊ ဗညားဒလရပ်ကွက်ရှိ ကမ္ဘောဇဘဏ်(ဒလ) ကို လူ ၉ ဦး လာရောက်အပ်နှံတဲ့ ငွေတွေထဲက ၁၀,၀၀၀ ကျပ်တန် ငွေစက္ကူအတု ၉ ရွက်နဲ့ ၅,၀၀၀ ကျပ်တန်ငွေစက္ကူအတု ၂ ရွက် တို့ကို တွေ့ရှိလို့ ဘဏ်ခွဲတာဝန်ခံ ဒလမြို့မရဲစခန်းကို လာရောက်အပ်နှံခဲ့တယ်လို့ ဆိုပါတယ်။
မှုခင်းရဲတပ်ဖွဲ့က အဆိုပါငွေစက္ကူအတုတွေကို ပဏာမစိစစ်ခဲ့ရာ နိုင်ငံခြားစက္ကူ အမျိုးအစား ဖြစ်ပြီး စက္ကူသားချောနေတာ၊ အစစ်ထက် အလျားနဲ့အနံ ၁ မီလီမီတာစီတိုတာ၊ အရောင် မှေးမှိန်တာ၊ လုံခြုံရေးကြိုးအရောင်ပြောင်းလဲမှုမရှိဘဲ ခရမ်းရောင်သာပါရှိတာ၊ ကာလာပရင်တာ နည်းနဲ့ တုပထားတာနဲ့ လျှို့ဝှက်ချက်တွေ မပါရှိတာကြောင့် ထိုင်းနိုင်ငံနယ်စပ်မှ တုပဝင်ရောက်လာတဲ့ ငွေစက္ကူအတုတွေဖြစ်ကြောင်း စစ်ဆေးတွေ့ရှိရတယ်လို့ သိရပါတယ်။
