Zero Line Area တွင်နေထိုင်သည့် ဘင်္ဂါလီ ၄၀၀၀ ကျော် ဘင်္ဂလားဒေ့ရ်ှသို့ ဝင်ရောက်
DVB
·
February 26, 2018
Zero line area ဘာလူခါလီ ဒုက္ခသည်စခန်းမှ တရားမဝင်နေထိုင်နေတဲ့ နေရပ်စွန့်ခွာ ဘင်္ဂါလီ ၄၀၀၀ ကျော်လောက်ဟာ ဖေဖော်ဝါရီ ၂၆ ရက်နေ့ မနက်ပိုင်းက ဘင်္ဂလားဒေ့ရှ် နိုင်ငံအတွင်းဖွင့်လှစ်ထားတဲ့ ကူတူပါလောင် ဒုက္ခသည်စခန်းကို ပြောင်းရွှေ့သွားကြောင်း စခန်းခေါင်းဆောင်တစ်ဦးဖြစ်တဲ့ မူဟာမတ်ရော်ချီက ပြောပါတယ်။
"ဟုတ်ပါတယ်၊ ကျနော်တို့က Zero line area အတွင်းမှာ နေရတာ ဒုက္ခများပါတယ်။ ဟို တစ်ရက်ကပဲ တောဆင်ရိုင်းတွေ ဝင်ပြီး လူနေတဲ့အိမ်တွေကို ဖြိုဖျက်ခြင်းခံရကာ ကလေးငယ် ၂ ဦး သေသွားပါတယ်။ နောက်ပြီး Zero line area မှာ နေရတာ ဈေးဝယ်ခြမ်းရတာ အခက်အခဲ့ ရှိပါတယ်။ ဘင်္ဂလားနဲ့လည်း ဝေးပါတယ်။ ချောင်းကူးပြီး သွားရတာပါ။ မြန်မာဘက်ကလည်း ဒီနေရာ လူနေအိမ်တွေ ဆောက်ပြီး နေလို့မရဘူးလို့ ပြောနေပါတယ်။ ဒါကြောင့် ပြောင်းရွှေ့ရတာ ဖြစ်တယ်။ အခုလက်ရှိ ဘာလူခါလီ Zero line area မှာ နေရပ်စွန့်ခွာ ဘင်္ဂါလီ ၂၀၀၀ ကျော် လောက်သာ ကျန်ပါတော့တယ်”လို့ပြောပါတယ်။
ဖေဖော်ဝါရီ ၁၉ ရက်နေ့မှာ ဘင်္ဂလားဒေ့ရှ်-မြန်မာ နှစ်နိုင်ငံကြားနယ်စပ် No Man Land ကြားနေဇုန်မှာ ခိုလှုံနေကြတဲ့ ဘင်္ဂါလီတွေဟာ မြန်မာက ပြန်လည်လက်မခံမီ ကုလသမဂ္ဂတပ်တွေ ရခိုင်မှာထားရှိဖို့၊ နိုင်ငံသားဖြစ်ခွင့်ကို ရိုဟင်ဂျာတိုင်းရင်းသားအနေနဲ့ပေးဖို့ စတဲ့အချက်တွေ အပါအ၀င် တောင်းဆိုချက် (၁၂) ချက် တောင်းဆိုပြီး ဆန္ဒထုတ်ဖော်ခဲ့ကြပါတယ်။
ဖေဖော်ဝါရီ ၂၀ နေ့က ဘင်္ဂလား-မြန်မာ ခရိုင်အဆင့် ၂ နိုင်ငံအလံတင် အခမ်းအနား ပြုလုပ်ပြီး ခေါင်းဆောင်တွေ ဘာလူခါလီ Zero line area ကို သွားရောက်ကြည့်ရှုစဉ်မှာလည်း တောင်းဆိုချက် ၁၂ ချက်ကို တောင်းဆိုခဲ့ကြကြောင်း သိရပါတယ်။
သတင်း - မင်းကျော်အောင်
