ပေါက်တောတွင် စက်လှေတိမ်းမှောက်၊ ကျောင်းသား ၂ ဦး ပျောက်ဆုံးနေ
DVB
·
October 7, 2017
ရခိုင်ပြည်နယ်၊ ပေါက်တော ကျောက်စုကျေးရွာ ချောင်းအဝမှာ လေးပြင်းတိုက်ခိုက်ခဲ့တာကြောင့် စက်လှေတစီးတိမ်းမှောက်လို့ ကျောင်းသား ၂ ဦး ပျောက်ဆုံးနေပါတယ်။
အောက်တိုဘာ ၆ ရက်နေ့ မနက်ပိုင်း ၉ နာရီဝန်းကျင်က ချစ်ကြည်ရေးဘောလုံးကန်ဖို့ သွားတဲ့ စက်လှေတစီး နစ်မြုပ်ခဲ့တာလို့ ပေါက်တောမြို့မရဲစခန်း တာဝန်ရှိသူတဦးက ဒီဗွီဘီကို ပြောပါတယ်။
“လောလောဆယ် ၂ ယောက်ပျောက်ဆုံးနေတယ်ခင်ဗျ။ ကျောင်းသားတွေပါတယ်။ ရွာသားတွေတွေလည်း ပါတယ်။ ချစ်ကြည့်ရေးဘောလုံးကန်ဖို့ တန်းလွဲချောင်းဆိုတဲ့ရွာကို ကျောက်စုရွာသူတွေ သွားတာပါ။ အဲဒီမှာ စက်လှေနဲ့ သွားပါတယ်။ အဲ့ဒီမှာ လူ ၂၀ လောက်ပါလာတယ်။ ကျောက်စု ကျေးရွာချောင်းဝအထွက်မှာ လေပြင်းထန်လာလို့ စက်လှေက တိမ်းမှောက်သွားတာ၊ နစ်မြုပ်သွားတာပေ့ါ။ ကျောင်းသား ၂ ဦး ပျောက်နေဆဲပါ။။ ကျန်တဲ့သူတွေ ကတော့ ဘာမှမဖြစ်ဘူး။”
ညနေ ၅ နာရီအချိန်အထိ ဒီနေ့မနက်ပိုင်းထိ ပျောက်ဆုံးနေတဲ့သူနှစ်ဦးကို လိုက်လံရှာဖွေတွေပြုလုပ်နေပြီး အခုအချိန်အထိ ရှာဖွေမရရှိသေးလို့ သိရပါတယ်။
“အဲဒီမှာ ကျောက်စုရဲစခန်းရှိတယ်။ သူတို့အပါအဝင် ကျနော်တို့ အဖွဲ့ဝင်တွေက ပျောက်ဆုံးနေတဲ့ လူတွေကို ရှာဖွေနေပါတယ်။ အဲ့ဒီရွာက အုပ်ချုပ်ရေးမှူး အပါအဝင်ပေါ့လေ။ အခုအထိ ပျောက်ဆုံးနေတဲ့သူ ၂ ဦးကိုတော့ ရှာမတွေသေးဘူးခင်ဗျ။”
ရခိုင်ပြည်နယ်အတွင်း လမ်းပန်းဆက်သွယ်ရေး ခက်ခဲမှုတွေကြောင့် မြစ်ချောင်းတွေကို စက်လှေတွေအားပြုပြီး ကျောင်းသူ၊သားတွေအပါအဝင် ဒေသခံတွေက နေ့စဉ်နေ့တိုင်း သွားလာနေကြရပါတယ်။
