တနင်္သာရီတိုင်း မြိတ်မြို့မှာ လက်ကိုင်းဖုန်းတွေ လုယက်နေတဲ့အဖွဲ့ကို သြဂုတ် ၂၉ ရက် ညပိုင်းက ဖမ်းဆီးရမိခဲ့တယ်လို့ မြိတ်မြို့မရဲစခန်းက ပြောပါတယ်။ သြဂုတ် ၂၉ ရက်၊ ညပိုင်းက နယ်မြေလှည့်ကင်းဆောင်ရွက်နေချိန် မြိတ်တောင်ကျေးရွာ၊ ရာပြည့်ရပ်ကွက်မှာ လူ ၃ ယောက် လက်ကိုင်ဖုန်းတလုံး လိုက်ရောင်းနေကြောင်း သိရလို့ သွားရောက်စစ်ဆေးရာကနေ ဖမ်းဆီးမိခဲ့တာလို့ နယ်ထိန်းခေါင်းဆောင် ဒုရဲအုပ်ထွန်းထွန်းနိုင်က “ကျနော်တို့အဖွဲ့ ရာပြည့်ရပ်ကွက်ဘက်ကို နယ်မြေလှည့်ကင်းထွက်တဲ့အချိန် ရာပြည့် ၁ လမ်းဘက်မှာ လူ ၃ ယောက် ဖုန်းတလုံး လိုက်ရောင်းနေတယ်ကြားလို့ သွားပြီးစစ်ဆေးတာ စွမ်းထက်အောင်နဲ့အတူ ရဲထိုက် နဲ့ မင်းဇော်တို့ကို တွေ့တယ်၊ စွမ်းထက်အောင်ရဲ့ လက်မှာကိုင်ထားတဲ့ iphone ကို မသင်္ကာလို့ စစ်ဆေးကြည့်တော့ ဖုန်းနဲ့ပတ်သက်တဲ့ အထောက်အထား သူတို့မပြောနိုင်ခဲ့ဘူး၊ ရဲစခန်းခေါ်လာပြီး ထပ်စစ်ဆေးတော့ စွမ်းထက်အောင်ရဲ့ထွက်ဆိုချက်အရ သူတို့ ၃ ယောက်အပြင် နောက်ထပ် လုယက်မှုကျူးလွန်ခဲ့တဲ့ ခင်ဇော်(ခ)ဂျက်လီ၊ ဝိုင်းချစ်နဲ့  သူရစိုး(ခ)ခွက်ပျောက်တို့ကို ဖော်ထုတ်ဖမ်းဆီးနိုင်ခဲ့ပါတယ်။” လုယက်ခံရတဲ့ ဖုန်းပိုင်ရှင်တွေကို စုံစမ်းဖော်ထုတ်ပြီး လုယက်ခံရတဲ့နေရာ၊ လုယက်ခံရတဲ့ ဖုန်းအမျိုးအစား၊ လုယက်ခံရတဲ့ အချိန်နဲ့ လုယူသူ ပုံသဏ္ဌာန်များ မေးမြန်းစိစစ်ပြီး ဖုန်းပိုင်ရှင်တွေကို ပြန်လည်ပေးအပ်သွားမယ်လို့ သိရပါတယ်။ “သူတို့ ၆ ယောက်ဆီက လုယက်တဲ့ဖုန်းတွေကို စစ်ဆေးတော့ ဖုန်းအလုံးရေ ၂၅ လုံး သိမ်းဆည်းခဲ့ပါတယ်။ ဖုန်းပိုင်ရှင်တွေက ၆ ယောက် ဆက်သွယ်လာပါပြီ၊ နောက်ထပ် ဖုန်းပိုင်ရှင်တွေကိုလည်း ထပ်မံစုံးစမ်းနေပါတယ်” လို့ ဒုရဲအုပ် ထွန်းထွန်းနိုင်က ပြောပါတယ်။ လုယက်မှုကျူးလွန်သူ ၆ ယောက်အား မြိတ်မြို့မရဲစခန်းက ရာဇသတ်ကြီးပုဒ်မ ၃၈၀/ကျင့် ၅၄ အရ အမှုဖွင့်ထားတယ်လို့ သိရပါတယ်။ မြတ်ထွဋ် (မြိတ်)