တောင်ကိုရီးယား သမ္မတရဲ့ဟိုးလေးတကျော် အရှုပ်တော်ပုံ
DVB
·
November 21, 2016
အမေရိကန် ဒီမိုကရက်ပါတီ သမ္မတလောင်း ဟီလာရီကလင်တန်ရဲ့ အီးမေးကိစ္စနဲ့ ဆက်တိုက်ဆိုသလို နိုင်ငံတကာကို ပွင့်ထွက်လာတဲ့ ဟိုးလေးတကျော်ကိစ္စတခုကတော့ တောင်ကိုရီးယားသမ္မတ ပတ်ဂွမ်ဟိုင်းရဲ့ မိတ်ဆွေရင်းချာ အမျိုးသမီး ချွိုင်ဆွန်ဆီနဲ့ သမ္မတပတ်တို့ရဲ့ ဆက်ဆံရေးမှာ သမ္မတရဲ့ အစိုးရပိုင်းဆိုင်ရာကိစ္စတွေအထိ သြဇာလွှမ်းမိုးတာတွေ ရှိနေတယ်လို့ စွပ်စွဲပြောဆို ကန့်ကွက်လာကြတာပဲ ဖြစ်ပါတယ်။
ဒီမိုကရက်သမ္မတလောင်း ဟီလာရီအတွက် သူ့ရဲ့ ပုဂ္ဂလိက အီးမေးအကောင့်နဲ့ အစိုးရကိစ္စတွေကို ဆက်သွယ်ခဲ့တယ်ဆိုတဲ့ကိစ္စ ပေါ်ထွက်လာတာဟာ သူ့ရဲ့ သမ္မတ မဲဆွယ်စည်းရုံးရေးမှာ နောက်ဆုံးအချိန်အထိ အနှောင့်အယှက် အဟန့်အတားဖြစ်ပြီး သမ္မတရွေးပွဲမှာ လူထုထောက်ခံမှုနည်းတဲ့ ရီပတ်ဘလစ်ကန်သမ္မတလောင်း ဒေါ်နယ်လ်ထရမ့်က အနိုင်ယူသွားနိုင်ခဲ့တဲ့အထိ ဖြစ်ခဲ့ရတာကို စာဖတ်သူတွေ သိခဲ့ကြပြီး ဖြစ်ပါတယ်။
တောင်ကိုရီးယားသမ္မတ မစ္စပတ်ဂွမ်ဟိုင်းရဲ့ သူ့ရဲ့မိတ်ဆွေရင်းချာ အမျိုးသမီး ချွိုင်ဆွန်ဆီနဲ့ ပေါင်းသင်းဆက်ဆံရေးမှာ အစိုးရလုပ်ငန်းကိစ္စတွေအထိ ချွိုင်ဆွန်ဆီက သြဇာလွှမ်းမိုးခဲ့တယ်။ အဲဒီလို သြဇာလွှမ်းမိုးလာတာကိုလည်း သမ္မတ ပတ်ဂွမ်ဟိုင်းက ခွင့်ပြုလိုက်လျောခဲ့တယ်ဆိုတာ ပေါ်လွင်လာခဲ့တဲ့အတွက် ဒီကိစ္စကို ကန့်ကွက်ဆန့်ကျင်လာခဲ့ကြတဲ့ နိုင်ငံရေးလောကနဲ့ ပြည်သူလူထုတွေက ခုဆို သမ္မတပတ်ကို နုတ်ထွက်ပေးဖို့အထိ တောင်းဆိုလာခဲ့ကြတာ တွေ့ရပါတယ်။
အဲဒီကိစ္စကြောင့် တောင်ကိုရီးယား တရားရုံးက သမ္မတရဲ့ မိတ်ဆွေရင်းချာဖြစ်သူ ချွိုင်ဆွန်ဆီကို ဖမ်းဝရမ်းထုတ်ပေးရတဲ့အထိ ဖြစ်ခဲ့ပြီး ချွိုင်ဆွန်ဆီတယောက် အောက်တိုဘာလ ၃၁ ရက်နေ့ (တနင်္လာနေ့) ကတည်းက ဖမ်းဆီးထိန်းသိမ်းတာ ခံခဲ့ရပါတယ်။ သူ့ကို အစိုးရကိစ္စတွေကို ဝင်ရောက်စွက်ဖက်မှုနဲ့ သူ ကိုင်တွယ်ထိန်းချုပ်ထားတဲ့ အမြတ်အစွန်းရယူမှုမလုပ်တဲ့ ရန်ပုံငွေတွေအတွက် စီးပွားရေးလုပ်ငန်းတွေက အလှူငွေတွေ ထည့်ဝင်လာအောင် ရေလာမြောင်းပေးလုပ်ပြီး ရယူခဲ့တယ်ဆိုပြီး စွပ်စွဲထားခဲ့ပါတယ်။ ခုချိန်မှာတော့ တရားစွဲဆိုသူတွေဘက်က သူ့အပေါ်စွပ်စွဲထားတဲ့ ကိစ္စတွေအတွက် စစ်ဆေးနေပြီ ဖြစ်ပါတယ်။ အဲဒီကိစ္စတွေအတွက် တာဝန်ရှိတဲ့သူက သမ္မတသာဖြစ်တယ်ဆိုပြီး သမ္မတပတ်ကို နုတ်ထွက်ခိုင်းတဲ့အထိ ဖြစ်လာခဲ့တာပါ။
နိုဝင်ဘာလ ၃ ရက်နေ့ ကြာသပတေးနေ့မှာတော့ တရားရေးဝန်ကြီးဌာနဝန်ကြီး ကင်မ်ဟွန်ဝွန်းက စုံစမ်းစစ်ဆေးရေးဘက်က လိုအပ်မယ်ဆိုရင် သမ္မတပတ်ဟာ တရားစွဲဆိုရေး အရာရှိတွေရဲ့ မေးခွန်းထုတ်တာကို ခံရနိုင်တယ်လို့ ပြောခဲ့ပါတယ်။
နိုင်ငံရေးသမားတွေနဲ့ ပြည်သူလူထုအင်အားနဲ့ ဆန့်ကျင်ကန့်ကွက်မှုကို ခံလာရတဲ့ သမ္မတပတ်ဟာ နိုဝင်ဘာလ ၄ ရက် သောကြာနေ့က ကိုရီးယားပြည်သူလူထုကို လူသိရှင်ကြား အားလုံးဟာ သူ့ရဲ့အမှားသာဖြစ်တဲ့အကြောင်း ဝန်ခံတောင်းပန်ခဲ့တာ တွေ့ရပါတယ်။ ဒါပေမယ့် ကိုရီးယားပြည်သူလူထုနဲ့ နိုင်ငံရေး အတိုက်အခံတွေအားလုံးကတော့ ဒါဟာ သမ္မတ တယောက်အနေနဲ့ ခွင့်လွှတ်နိုင်စရာမရှိတဲ့ အပြစ်ကျူးလွန်မှု ဖြစ်တယ်လို့ သဘောထားပြီး သူ့ကို နုတ်ထွက်ပေးဖို့ တောင်းဆိုနေကြတာပဲ ဖြစ်ပါတယ်။
ပြီးခဲ့တဲ့အပတ်ကတော့ သမ္မတပတ်က တချို့အချက်အလက်တွေကို မစ္စချွိူင်နဲ့အတူတူ တိုင်ပင်ဆွေးနွေးခဲ့တာဖြစ်ပြီး သမ္မတရဲ့ မိန့်ခွန်းတွေကိုလည်း တည်းဖြတ်ခွင့်ပြုခဲ့တယ်လို့ ဝန်ခံပြောဆိုပြီး ထပ်တောင်းပန်ခဲ့ပါတယ်။ “ပြည်သူလူထုကြီးကို ကျမ နက်နက်နဲနဲ တောင်းပန်ပါတယ်” လို့ မစ္စပတ်က ရှားရှားပါးပါး လေသံပျော့နဲ့ တောင်းပန်ခဲ့ပေမယ့် နောက်ဆုံး လူထုထောက်ခံမှု စစ်တမ်းအရတော့ သူ့ကို ထောက်ခံသူက ၉ ရာခိုင်နှုန်းပဲ ရှိနေတာကို တွေ့ရပါတယ်။
သမ္မတပတ်က အဲဒီလောက်အထိ မစ္စချွိုင်ကို ဘာလို့ ဒီလောက်ထိ တိုင်းရေးပြည်ရာကိစ္စက စလို့ ဘာလို့များ ယုံကြည်အပ်နှံ ပေါင်းသင်းဆက်ဆံနေရတာပါလဲ။ ဒါက တောင်ကိုရီးယား ပြည်သူလူထုတွေအနေနဲ့ မေးကိုမေးရမယ့် မေးခွန်းဖြစ်သလို သိကိုသိရမယ့်အဖြေဖြစ်တယ် ဆိုတာကတော့ ရှင်းပါတယ်။ ဒါကြောင့်လည်း ဒီကနေ့အထိ တောင်ကိုရီးယားပြည်သူတွေက လမ်းပေါ်ထွက်ပြီး သူတို့ ရွေးချယ်တင်မြှောက်ခဲ့တဲ့ သမ္မတကို သူတို့ကိုယ်တိုင် ကန့်ကွက်ဆန့်ကျင် နုတ်ထွက်ပေးဖို့ တောင်းဆိုနေကြတာပဲ ဖြစ်ပါတယ်။ တောင်ကိုရီးယားပြည်သူတွေက သူတို့ ရွေးချယ်ပေးလိုက်တဲ့ လွှတ်တော်အမတ်တွေ၊ အစိုးရအဖွဲ့ဝင်တွေနဲ့ နိုင်ငံအထွတ်အထိပ်အဖြစ် သူတို့ရွေးချယ်ပေးလိုက်တဲ့ သမ္မတဟာ ဘာလုပ်ဖို့ တာဝန်ရှိတယ်၊ ဘာတွေလုပ်ရမယ်၊ ဘာတွေလုပ်လို့ မရဘူး၊ မလုပ်ရဘူး ဆိုတဲ့ အချက်တွေကို နိုင်ငံရေးပညာရေးအရ သိရှိနားလည်ပြီး ဖြစ်ပါတယ်။
စကားညှပ်အရ ကျနော်တို့နိုင်ငံက သမ္မတ ဘာလုပ်လုပ် အစိုးရအဖွဲ့ဝင် ဝန်ကြီးတွေ ဘာလုပ်လုပ် ဘာမှမသိ၊ သိခွင့်မရတဲ့ ပြည်သူလူထုတွေအဖို့ သမ္မတ အပါအဝင် အစိုးရအဖွဲ့ဝင်တွေ အားလုံး ဘာလုပ်လုပ်၊ ဘာပြောပြော ခေါင်းညိတ်လိုက်တာဟာ အန္တရာယ် အကင်းဆုံးဆိုတဲ့ အချောင်သမား အတွေးအခေါ်ကို အမှန်တရားအဖြစ်၊ ကျင့်ဝတ်အဖြစ် လက်ခံလိုက်ကြပါပြီလား။ အဲဒီအချက် မှန်သွားမှာ၊ အဲဒီ အတွေးအခေါ် အယူအဆဟာ မှန်တယ်၊ တို့ ဒီလိုနေမှဖြစ်မယ်ဆိုပြီး ယုံကြည်တွေးမြင်သွားမှာကိုတော့ ကျနော် အမှန်တကယ် စိုးရိမ်မိပါတယ်။
တကယ်တော့ တောင်ကိုရီးယားသမ္မတ မစ္စပတ်ဂွမ်ဟိုင်းရဲ့ ခု နိုင်ငံရေးရာကိစ္စတွေနဲ့ အလှူငွေကိစ္စတွေ ပေါ်ပေါက်လာတာက လပိုင်းပဲ ရှိပါသေးတယ်။ သူက ကိုရီးယားနိုင်ငံက အကြီးဆုံးကော်ပိုရေးရှင်းကြီးတွေကို ဒေါ်လာသန်း ၇၀ ကျော် ငွေညှစ်ရယူခဲ့တဲ့အတွက် သူ့အပေါ် ပြည်သူလူထုရဲ့ ယုံကြည်မှုကတော့ အကြီးအကျယ် ထိုးကျသွားခဲ့ပါတယ်။ နောက် တက္ကသိုလ်ဝင်ခွင့်ကိစ္စမှာလည်း အတော်ဆုံး မဟုတ်ခဲ့တဲ့ သူ့သမီးကို ဂုဏ်သိက္ခာကြီးမားတဲ့ Ewha အမျိုးသမီးတက္ကသိုလ်ကို ဝင်ရောက်ခွင့်ပေးခဲ့တဲ့ ကိစ္စမှာလည်း မသမာ ဖောက်လွှဲဖောက်ပြန် လုပ်ခဲ့တဲ့အတွက် လူထုယုံကြည်မှု ပျက်ပြားခဲ့တဲ့အဖြစ် ရှိခဲ့ပါတယ်။ Ewha တက္ကသိုလ်ကျောင်းသားတွေရဲ့ မျက်နှာသာပေးမှု ဆန့်ကျင်ရေး ကန့်ကွက်ဆန္ဒပြမှုတွေကလည်း သမ္မတပတ်နဲ့ သူ့ရဲ့လူယုံဆက်ဆံရေးကိစ္စကို ပိုပြီး စုံစမ်းမေးမြန်းစရာ ဖြစ်စေခဲ့တဲ့အတွက် သမ္မတရဲ့ အပျက်အဆင်းကို ပထမဖြစ်စေခဲ့တဲ့ အကြောင်းတရားတခုလို့ ယူဆရမှာပဲ ဖြစ်ပါတယ်။ ဒါကလည်း ကိုရီးယားနိုင်ငံမှာ သိပ်တော့ မဆန်းလှပါဘူး။
ကိုရီးယားပြည်သူလူထုက အရင် အာဏာရှင်သမ္မတ ချွန်းဒူးဝမ် လက်ထက် ဒေါ်လာသန်းတထောင်နီးပါး မသမာတဲ့နည်းနဲ့ ရယူသွားခဲ့တာကို သိရှိထားခဲ့ပြီး ဖြစ်ပါတယ်။ လက်ရှိသမ္မတ ပတ်ဂွမ်ဟိုင်းလက်ထက်မတိုင်ခင် ကိုရီးယားသမ္မတ ဖြစ်ခဲ့တဲ့ လီမြောင်ဘတ်ရဲ့ ဒေါ်လာ ဘီလျံ ၂၀ နီးပါးတန်တဲ့ မြစ်လေးမြစ်စီမံကိန်း ဆိုတာကလည်း အစိုးရငွေတွေကို အကြီးစားဆောက်လုပ်ရေး လုပ်ငန်းကြီးတွေ လုပ်နေကြတဲ့ ခရိုနီတွေလက်ထဲကို တွန်းပို့ပေးလိုက်တဲ့ အဂတိလိုက်စားမှု စီမံကိန်းကြီးအဖြစ် လူသိများခဲ့တာလည်း လူသိရှင်ကြား ဖြစ်ခဲ့တာပါပဲ။ သမ္မတအဆက်ဆက်ဟာ ပိုကောင်းတာထက် ပိုဆိုးတာက များခဲ့တော့ ကိုရီးယားပြည်သူလူထုဟာ သူတို့ရဲ့သမ္မတတွေဆီက အဂတိလိုက်စားမှုကို မျှော်လင့်ထားခဲ့ကြပြီး ဖြစ်တယ်လို့တောင် လေ့လာသုံးသပ်သူတွေက ဆိုပါတယ်။ ဒီလိုဖြစ်နေပေမယ့် သမ္မတ ပတ်ဂွမ်ဟိုင်းကျမှ ဘာဖြစ်လို့ ဒီလောက် ပြင်းပြင်းထန်ထန်တုံ့ပြန်မှုနဲ့ ကြုံတွေ့ရသလဲလို့ မေးစရာအကြောင်း ရှိပါတယ်။ အကြောင်းကတော့ ကိုရီးယားပြည်သူလူထုက သမ္မတပတ် အဂတိလိုက်စားတာကို တွေ့ရှိသွားလို့ မဟုတ်ပါဘူး။ သူတို့ရဲ့သမ္မတပတ်ဟာ လူတယောက်ရဲ့ မဆင်မခြင် အဂတိလိုက်စားတာကို ခံနေခဲ့ရလို့ပဲ ဖြစ်ပါတယ်။ ဘာဖြစ်လို့များ သမ္မတပတ်ဟာ သူ့အုပ်ချုပ်ရေးအန္တရာယ် ဖြစ်လောက်အောင်အထိ ချွိုင်ဆွန်ဆီအတွက် လုပ်ပေးခဲ့တာလဲ ဆိုတာကို အထိတ်တလန့် ဖြစ်ခဲ့ကြတာပါ။ သမ္မတဖြစ်တဲ့ ပတ်ဟာ ဘာမှမဟုတ်တဲ့ လူတယောက်အတွက် ဘာလို့ ဒီလောက်ဒုက္ခခံခဲ့ရတာပါလဲ။ တကယ်တော့ သမ္မတပတ်ဂွမ်ဟိုင်းဟာ ချွိုင်ဆွန်ဆီကို ချွိုင်ရဲ့အဖေ ချွိုင်တေမင်းကမှတဆင့် တွေ့ဆုံခဲ့ရတာပါ။ ချွိုင်တေမင်းဟာ ခရစ်ယာန် ဘာသာရေးဂိုဏ်းအတုတခုရဲ့ ခေါင်းဆောင်တယောက် ဖြစ်ခဲ့ပါတယ်။ အစက ပုလိပ်တပ် အဖွဲ့ဝင်တယောက်၊ စစ်သားတယောက် ဖြစ်ခဲ့ပေမယ့် ၁၉၇၀ စုနှစ်ကာလတွေမှာတော့ သူဟာ ဘာသာရေးဂိုဏ်းခေါင်းဆောင်ဘဝကို အပီအပြင်ခံယူခဲ့ပြီး လူတွေကို ဆေးကုသပေးခဲ့တယ်လို့ ဆိုပါတယ်။ သူ့ကိုယ်သူ သင်းအုပ်ဆရာတယောက်လို့ ခေါ်ခဲ့ပေမယ့် ဘယ်တုန်းကမှ ကျမ်းစာသင်ကျောင်းတွေ ဘာတွေ တက်ရောက်ခဲ့တာ မရှိခဲ့ပါဘူး။
ချွိုင်တေမင်းက ပတ်ဂွမ်ဟိုင်း အသက် ၂၃ နှစ်သမီးအရွယ် ၁၉၇၅ ခုနှစ်မှာ စတင်တွေ့ဆုံခဲ့ပြီး အဲဒီအချိန်ဟာ သူ့မိခင်ကို မြောက်ကိုရီးယား စပိုင်တယောက်က လုပ်ကြံသတ်ဖြတ်ခံရလို့ မိခင်ကို ဆုံးရှုံးပြီးခါစအချိန် ဖြစ်ပါတယ်။ (တကယ်တော့ မြောက်ကိုရီးယားစပိုင်က သူ့အဖေ သမ္မတ ပတ်ချွန်ဟီးကို လုပ်ကြံခဲ့တာဖြစ်ပေမယ့် သမ္မတကတော်ပဲ သေဆုံးသွားခဲ့ရတာပါ)။ ချွိုင်တေမင်းက ပတ်ဂွမ်ဟိုင်းကို သူ့အမေရဲ့ဝိညာဉ်က သူ့ဆီ လာလည်လေ့ရှိတဲ့အတွက် သူ့အမေ ပြောတာတွေကို သူ့ဆီကတဆင့် ကြားရနိုင်တယ်လို့ စာတွေအများကြီး ရေးသားပေးပို့ခဲ့ရာက ဇာတ်လမ်းစခဲ့တာ ဖြစ်ပါတယ်။ မစ္စပတ် သမ္မတဖြစ်ပြီးချိန်မှာ ချွိုင်တေမင်းကို သမ္မတအိမ်တော်ကို ဖိတ်ခေါ်တွေ့ဆုံခဲ့ပြီး အဲဒီအချိန်မှာ ချွိုင်တေမင်းက ပတ်ရဲ့မိခင်ဟာ တကယ်သေဆုံးတာမဟုတ်ဘဲ ပတ်ဂွမ်ဟိုင်းအတွက် လမ်းဖွင့်ပေးခဲ့တာသာဖြစ်ကြောင်း ပြောကြားခဲ့တယ်လို့ ဆိုပါတယ်။ အဲဒါဟာပဲ သမ္မတ ပတ်ဂွမ်ဟိုင်းနဲ့ ချွိုင်မိသားစုရဲ့ မသူတော်ချင်း သတင်းလွေ့လွေ့ စပြီးဖြစ်ခဲ့ကြ၊ ချွိုင်တေမင်းရဲ့သမီး ချွိုင်ဆွန်ဆီနဲ့ သမ္မတပတ်တို့ရဲ့ ဆက်ဆံရေး စတင်ခဲ့တာပဲ ဖြစ်ပါတယ်။
ဘာသာရေးဂိုဏ်းဆရာရဲ့ သမီးကလည်း သမ္မတပတ်ကို သြဇာလွှမ်းမိုးအောင် လုပ်ခဲ့ပုံရပါတယ်။ ဒါပေမယ့် ဒါကို သမ္မတတယောက်ဖြစ်တဲ့ ပတ်ဂွမ်ဟိုင်းက သူ့ရဲ့အုပ်ချုပ်ရေးကိစ္စ၊ နိုင်ငံကိစ္စတွေကအစ စွက်ဖက်ပတ်သက်ခွင့်ပြုခဲ့တာကတော့ တောင်ကိုရီးယား ပြည်သူလူထုတွေအဖို့ ဘယ်လိုမှ သည်းညည်းခံနိုင်စရာ မရှိတာကိုတော့ အပြစ်မဆိုသာပါဘူး။
ကျနော့်အမြင်အရတော့ တာဝန်သိတဲ့ သမ္မတ တယောက်အနေနဲ့ ၂ ကြိမ်တိုင်တိုင်လည်း တောင်းပန်ပြီးတဲ့အထိ ပြည်သူလူထုက နုတ်ထွက်ပေးဖို့ တောင်းဆိုနေဆဲဖြစ်လို့ နုတ်ထွက်ပေးလိုက်တာ အကောင်းဆုံးဖြစ်မယ်လို့ ယူဆမိပါကြောင်း။ ။
စိုးနေလင်း
